মুণ্ডন কৰি নাগৰিকত্ব (সংশোধন) আইন বাতিলৰ দাবীত প্ৰতিবাদ এগৰাকী মহিলাৰ। মহানগৰীৰ চচলত সদৌ অসম প্ৰাথমিক মধ্যাহ্ন ভোজন ৰান্ধনী সন্থাৰ উপদেষ্টা তৃষ্ণা নাথে মুণ্ডন কৰি ‘কা’ বাতিলৰ দাবীৰে প্ৰতিবাদ সাব্যস্ত কৰে।
প্ৰথমতে আৰক্ষী প্ৰশাসনে চুলি খুৰাবলৈ অহা নাপিতক বাধা প্ৰদান কৰি আঁতৰাই পঠাই যদিও প্ৰতিবাদস্থলীৰ কাষত থকা চেলুনত গৈ মুণ্ডন কৰে নাথে।
‘কা’ বাতিলৰ লগতে ৰান্ধনী সন্থাৰ অন্য এক দাবী হৈছে তেওঁলোকৰ মজুৰি ৯৫০০ লৈ বৃদ্ধি কৰাৰ লগতে চাকৰি নিয়মীয়াকৰণ কৰা। যদি তেওঁলোকৰ দাবী সমূহ মানি নলয় সামূহিক মুণ্ডনৰ লগতে উলংগ হৈ প্ৰতিবাদ কৰাৰো হুংকাৰ দিয়ে ৰান্ধনী সন্থাই।
“প্ৰথমতে কা বাতিল হ’বই লাগিব। চৰকাৰখনে যি মন যায় তাকে কৰিলে নহ’ব, আমিয়েই ভাঙি দিম চৰকাৰক। দ্বিতীয়তে ১ লাখ ১৭ হাজাৰ ৰান্ধনীক যোৱা ১৪ বছৰে কোনো এখন চৰকাৰে চকু মেলি নাচালে। ৰান্ধনী সকলৰ চাকৰি নিয়মীয়াকৰণ কৰিবই লাগিব, ৯৬০০ লৈকে তেওঁলোকৰ দৰমহা বৃদ্ধি হ’ব লাগিব।” দাবী ৰান্ধনী সন্থাৰ।
অহা ১৭ জানুৱাৰীত ৰাজ্যপালক স্মাৰকপত্ৰ প্ৰদান কৰিব বুলি জানিবলৈ দি নাথে কয় “যদি এইকেইদিনৰ ভিতৰত চৰকাৰে আমাৰ দাবীসমূহ মানি নলয় তেন্তে ফেব্ৰুৱাৰী মাহত দিল্লীত আমাৰ উলংগ প্ৰতিবাদ দেখিবলৈ পাব আৰু তাৰ বাবে জগৰীয়া হ’ব আমাৰ সর্বাদা মানে বৰলাকাই।”
