সংশোধিত নাগৰিকত্ব আইন বিৰোধী আন্দোলনকাৰীসকলে বিজেপিৰ নেতা মন্ত্ৰী, বিধায়কসকলক ক’লা পতাকা দেখুৱাই কৰা প্ৰতিবাদ আজিও অব্যাহত আছে।
আজি বিজেপিৰ ৰাজ্যিক সভাপতি ৰঞ্জিত কুমাৰ দাসে নিজ সমষ্টি সৰভোগত উপস্থিত হোৱাৰ পিছতেই আছু কৰ্মীসকলে দাসক ক’লা পতাকা জোকাৰি প্ৰতিবাদ সাব্যস্ত কৰে।
বৰনগৰ আঞ্চলিক ছাত্ৰ সন্থাৰ কৰ্মীসকলে ক’লা পতাকা জোকাৰি কৰা প্ৰতিবাদৰ পিছতে ৰঞ্জিত দাসে প্ৰত্যুত্তৰ হিচাপে প্ৰতিবাদী আছু কৰ্মীসকলক গামোচা জোকাৰি আদৰণি জনায়।
উল্লেখ্য যে, সৰভোগত অনুষ্ঠিত হোৱা শ্ৰীমন্ত শংকৰদেৱ সংঘৰ বৰপেটা জিলাৰ বাৰ্ষিক অধিবেশনত বিশিষ্ট অতিথি হিচাপে অংশগ্ৰহণ কৰিবলৈ আহোতে বিজেপিৰ ৰাজ্যিক সভাপতিগৰাকীয়ে ক’লা পতাকাৰ সন্মুখীন হয়।
লক্ষ্যণীয় যে, কেইদিনমান পূৰ্বে পাঠশালাত বিজেপি দলৰ প্ৰাক্তন মণ্ডল সভাপতি প্ৰাঞ্জল দাসৰ মৃত্যুৰ পিছত পৰিয়ালৰ খবৰ ল’বলৈ যোৱাৰ সময়তো বিজেপিৰ ৰাজ্যিক সভাপতিগৰাকীক ক’লা পতাকা প্ৰদৰ্শন কৰাত সভাপতি গৰাকীয়ে গামোচা জোকাৰি সম্ভাষণ জনাইছিল।
