ভোগালী বিহুৰ দিনটোতে অসমবাসীলৈ সুখবৰ কঢ়িয়াই আনিছে অসম ল’ন বল দলে। গুৱাহাটীত চলি থকা খেল’ ইণ্ডিয়া য়ুথ গেইমছত আজি অসমৰ দলটোৱে তিনিটা সোণ আৰু এটা ব্ৰঞ্জৰ পদক লাভ কৰিছে।
ল’ৰাৰ ১৭ অনূৰ্ধ্বৰ ব্যক্তিগত শাখাত সুৰজিৎ বৰগোঁহাইয়ে প্ৰথমটো স্বৰ্ণ পদক অৰ্জন কৰে। তদুপৰি ছোৱালীৰ ট্ৰিপল আৰু ল’ৰাৰ ফ’ৰ শাখাত স্বৰ্ণ পদক লাভ কৰিবলৈ সক্ষম হয়।
অসমৰ হৈ ছোৱালীৰ ট্ৰিপলছত স্বৰ্ণ অৰ্জন কৰা খেলুৱৈ গৰাকী হ’ল অদিনিতা কাকতি।
আনহাতে ২১ অনূৰ্ধ্বৰ ছোৱালীৰ দ্বৈত শাখাত জিনু আৰু কৰিনাই ব্ৰঞ্জ জিনিবলৈ সক্ষম হয়।
উল্লেখ্য যে এই পৰ্যন্ত আয়োজক অসমে ৬ টা স্বৰ্ণ, ৭ টা ৰূপ আৰু ১০ টা ব্ৰঞ্জৰে মুঠ ২৩ টা পদকেৰে তালিকাৰ ১১ নম্বৰ স্থানত আছে।
নিজৰ ঘৰৰ মাটিত অনুষ্ঠিত বৃহৎ প্ৰতিযোগিতাখনত অসমৰ খেলুৱৈ সকলে উন্নতমানৰ প্ৰদৰ্শনত ব্যৰ্থ হ’লেও ষষ্ঠ দিনটোত লাভ কৰা এনে সাফল্যই অৱশ্যে অসম দলটোৰ খেলুৱৈসকলক যথেষ্ট উৎসাহিত কৰিব বুলি ক্ৰীড়া প্ৰেমীসকলে আশা কৰিছে।
