অনলাইন যোগে অৰ্ডাৰ দিয়া সামগ্ৰী যোগান ধৰাৰ পিছত ফিডবেকৰ নামত বহু মহিলাৰ ফোন নম্বৰ সংগ্ৰহ কৰিছিল এজন ডেলিভাৰী বয়ে।
এটা আগশাৰীৰ ই-কমাৰ্চ কোম্পানীৰ ডেলিভাৰী বয় বিশাল বৰ্মা নামৰ যুৱক জনে সামগ্ৰী যোগান ধৰিবলৈ নিতৌ বহু লোকৰ ঘৰলৈ গৈছিল। য’তেই যুৱক জনে ধুনীয়া যুৱতী অথবা মহিলা দেখিছিল তাতেই তেওঁ ফিডবেক দিয়াৰ নামত মহিলা-যুৱতীৰ পৰা ফোন নম্বৰ সংগ্ৰহ কৰি লৈছিল।
ইয়াৰ পিছতে তেনে মহিলা-যুৱতীলৈ ফোন কৰিবলৈ আৰম্ভ কৰিছিল যুৱক জনে।
যিসকল মহিলা-যুৱতীয়ে বিশালৰ ফোনৰ প্ৰতি সঁহাৰি দিছিল তেওঁলোকক চিকাৰ হিচাবে বাচি লৈছিল যুৱক জনে।
প্ৰথমে ফোনত বন্ধুত্বৰ প্ৰস্তাৱ দি বিশালে তেনে মহিলা-যুতীৰ সৈতে সম্পৰ্ক ক্ৰমাৎ আগবঢ়াই নিছিল। সম্পৰ্ক গাঢ় হৈ পৰাৰ পিছত বহু মহিলা-যুৱতীৰে বিশালে ভিডিঅ’ কলিং আৰম্ভ কৰিছিল।
ভিডিঅ’ কলিঙৰ সময়ত বিশালে মহিলা-যুৱতীসকলৰ আপত্তিজনক ছবি কৌশলেৰে সংগ্ৰহ কৰি থৈছিল। পিছত তেনে মহিলা-যুৱতীক নিজৰ ঘৰলৈ মাতি বিশালে তেওঁলোকৰ আপত্তিজনক ছবি দেখুৱাই ব্লেকমেইল কৰিছিল আৰু বলাৎকাৰ কৰিছিল।
পশ্চিমবংগৰ হুগলীৰ চুচুড়াৰ ত্ৰিকোণ পাৰ্ক নিবাসী বিশাল বৰ্মা নামৰ ডেলিভাৰী বয় জনে এনেদৰে কিমান মহিলা-যুৱতীক ধৰ্ষণ কৰিছে তাৰ সঠিক হিচাব এতিয়াও উলিয়াব পৰা হোৱা নাই।
শেহতীয়াকৈ বিশালৰ জালত ভৰি দিয়া এগৰাকী মহিলাই বিশালৰ বিৰুদ্ধে চুচুড়া থানাত অভিযোগ দাখিল কৰাৰ পিছতে আৰক্ষীয়ে ডেলিভাৰী বয় বিশালক গ্ৰেপ্তাৰ কৰে।
আৰক্ষীয়ে প্ৰকাশ কৰা মতে বিশালে ব্লেকমেইল কৰি ৮ গৰাকী মহিলাক বলাৎকাৰ কৰাৰ তথ্য এতিয়ালৈকে জানিব পৰা গৈছে।
আদালতে বিশালক ৫ দিনৰ আৰক্ষীৰ জিম্মাত ৰখাৰ নিৰ্দেশ দিছে। আৰক্ষীৰ জেৰাত ওলাই পৰিব বিশালৰ আৰু বহু কলংকিত কাহিনীৰ কথা।
