যোৱা ২০ ফেব্ৰুৱাৰী তাৰিখে নগাঁও জিলাৰ ৰূপহী অঞ্চলত ধুবুৰী লোকসভা সমষ্টিৰ সাংসদ ৰকিবুল হুছেইন আৰু তেওঁৰ পুত্ৰ তাঞ্জিল হুছেইনৰ লগতে নিৰাপত্তাৰক্ষীক আততায়ীয়ে আক্ৰমণ কৰা ঘটনা সন্দৰ্ভত সামাজিক মাধ্যম ফেচবুকত কেইটামান প্ৰশ্ন উত্থাপন কৰিছে ৰাজ্যসভাৰ সাংসদ অজিত কুমাৰ ভূঞাই। তলত অজিত কুমাৰ ভূঞাই উত্থাপন কৰা প্ৰশ্নসমূহ হুবহু তুলি ধৰা হ’ল
১) ৰকিবুল হুছেইনৰ দেহৰক্ষীগৰাকীক সেইদিনা নিৰ্মমভাবে আক্রমণ কৰা হৈছে। উত্তেজিত এটা গুণ্ডাবাহিনীয়ে পুলিচ পোছাক পৰিহিত দেহৰক্ষীগৰাকীক চৰ, লাঠ, ভুকু সকলো শোধাইছে। এজন কৰ্তব্যৰত পুলিচক কৰা আক্রমণ সকলো পুলিচৰ বাবে চৰম অপমানজনক নহয়নে? এনে ঘটনা অন্য ৰাজ্যত হোৱা হ’লে কি হ’লহেতেন?
২) অসমৰ ৰাইজে এই ঘটনাক তীব্র নিন্দা কৰিছে। ইমানৰ পিছতো দেখা গৈছে যে অসম পুলিচে মৌনতা অৱলম্বন কৰিছে৷ শাসক দলৰ পৃষ্ঠাপোষকতা অবিহনে এনে আক্ৰমণ কেতিয়াও সম্ভব নহয়। আচৰিত কথা যে, চৰম এই দুৰ্ভাগ্যজনক ঘটনাটোৰ প্রতি অসম পুলিচে এতিয়ালৈকে কোনো অফিচিয়েল ষ্টেটমেন্ট দিয়া আমাৰ চকুত পৰা নাই। এসময়ত সুনাম থকা অসম পুলিচ সম্প্রতি হিমন্ত বিশ্ব শৰ্মাৰ ব্যক্তিগত বাহিনীত পৰিণত হৈছে,যাৰ বাবে আইনৰ শাসন এতিয়া সুদূৰপৰাহত।
৩) ৰকিবুল হুছেইনৰ দেহৰক্ষীগৰাকীৰ কাৰ্বাইন কাঢ়ি লব খোজাটো সাধাৰণ ঘটনা নহয় । গুণ্ডাবাহিনীৰ ওপৰত চৰকাৰৰ আশীৰ্বাদ অবিহনে এই ভয়াবহ কাম কেতিয়াও সম্ভব নহয়।
৪) অসম পুলিচৰ ওপৰমহলৰ বিষয়াসকললৈ উষ্মা প্রকাশ কৰি এটা কথা কব খুজিছো, মনে মনে থাকি আপোনালোকে কেৱল নিজৰ ব্যক্তিগত স্বাৰ্থত এনে ঘৃণনীয় কাৰ্য্যকো পৰোক্ষভাবে সমৰ্থন জনোৱা নাইনে?এবাৰ ভালদৰে ভাবি চাওক। পুলিচৰ খাকীত গোৰ মাৰিছে। কথাটো কিমান ভয়াবহ এবাৰ ভাবি চাওক, নহলে এদিন আপোনালোকৰ গাতো সেই গোৰ আহি পৰিবহি!
৫) মনত ৰখা ভাল যে অসম পুলিচৰ প্রতি ৰাইজৰ আস্থা দ্ৰুতগতিত কমি আহিছে। ইয়াৰ বাবে দায়ী কোন? এচাম উচ্চপদস্থ পুলিচ বিষয়া নহয়নে ? ঘটনাটোৱে অসম পুলিচৰ অসহায় ৰূপটোকে আকৌ প্রকট কৰি তুলিলে।
