কাৰ্বি আংলঙৰ ৰাজধানী ডিফুত এটি সাহসী শিশুৱে নিজৰ উপস্থিত বুদ্ধিৰ বলত আন এটা কণমাণি শিশুৰ জীৱন ৰক্ষা কৰিবলৈ সমৰ্থ্য হৈছে। শেহতীয়া প্ৰতিৱেদন অনুসৰি, ক্লাৰ্মিৰ ইংতিপি নামৰ ২ বছৰ ৮ মাহ বয়সীয়া শিশুটিয়ে তেওঁৰ ভতিজা চাৰ্কল তিমুংপিক ডুবি মৃত্যুৰ মুখত পৰাৰ পৰা ৰক্ষা কৰিবলৈ সক্ষম হয়।
এই প্ৰত্যুৎপন্নমতিত্ব সম্পন্ন শিশুটোৱে তাইৰ ককাক ছেমছন ইংতি আৰু আইতাক ৰাণী বেইপিৰ ডিফু চহৰত থকা ঘৰলৈ ফুৰিবলৈ আহিছিল। সিদিনা আছিল নৱেম্বৰৰ ১২ তাৰিখ। শিশুটিয়ে হিদিপিৰ পৰা ডিফুৰ লৰুলাংছোলৈ সেইদিনা ফুৰিবলৈ আহিছিল। শিশুটিৰ আইতাকে জনোৱা মতে শিশুটি অত্যন্ত বুধিয়ক আৰু প্ৰয়োজনত অচিনাকি লোকৰ সৈতে কথা পাতিবলৈ সংকোচ নকৰে।
১২ নৱেম্বৰৰ দুপৰীয়া শিশুটি আৰু তাইৰ ২ বছৰতকৈও কম বয়সীয়া ভতিজা চাৰ্কলে ইফালে সিফালে ঘূৰা-ফিৰা কৰি আছিল। সেই সময়ত কাৰ্বিসকলৰ পৰম্পৰাগত উৎসৱ কাৰ্কলি অনুষ্ঠিত হৈ আছিল। সেই সময়তেই ক্লাৰ্মিলৰ চকুৰ আগতেই চাৰ্কেল ওচৰৰে পুখুৰীত পৰি যায়।
ক্লাৰ্মিলে কান্দি থকা সময়তেই স্কুলীয়া ছাত্ৰ-ছাত্ৰীক ঘৰত থবলৈ এখন অটো ৰিক্সা আহে। অটো চালক ৰাজেশ টোকবিয়ে কিবা এটা নহ’বলগীয়া ঘটনা ঘটনা ঘটা বুলি গম পায়। শিশু ক্লাৰ্মিলে আঙুলিৰে তেওঁৰ হাতত ধৰি লৈ যায়। পুখুৰী পাৰলৈ গৈ কাৰ্মিলে পানীলৈ দেখুৱাই দিয়ে যদিও একো দেখা পোৱা নগৈছিল।
সময় নষ্ট নকৰি, টোকবিয়ে পানীলৈ নামি যায় আৰু চাৰ্কলক পানীৰ পৰা উঠাই আনে। ইতিমধ্যে পুখুৰীৰ পাৰত মানুহ গোট খায় আৰু তেওঁলোকে শিশুটিৰ পিতৃ-মাতৃক খবৰ দিয়ে। কিছু দিন চিকিৎসালয়ত থকাৰ পাছত শিশুটি সুস্থ হৈ উঠে।
ক্লাৰ্মিল হিদিপিৰ চিনথং ইংতি গাঁৱৰ ছাৰমন ইংতিৰ জীয়ৰী। ক্লাৰ্মেলক এতিয়ালৈকে প্ৰিপায়াৰেটৰী স্কুলত নামভৰ্তি কৰোৱা হোৱা নাই।
