অৱসৰৰ কথা ঘোষণা কৰিলে অসম ফুটবলৰ কিংবদন্তি দুৰ্গা বড়োৱে। কোকৰাঝাৰ ছাই ষ্টেডিয়ামত বড়োলেণ্ড টেৰিটৰিয়েল কাউন্সিল চৰকাৰ আৰু অসম ফুটবল এছ’চিয়েশ্যনৰ উদ্যোগত আয়োজিত এক বৃহৎ বিদায় অনুষ্ঠান। ইণ্ডিয়ান ছুপাৰ লীগ আৰু সুব্ৰ’টো কাপৰ দৰে বৃহৎ প্ৰতিযোগিতাত ভাৰতৰ হৈ খেলাকে ধৰি বড়োৰ সাফল্যক উদযাপন কৰিবলৈ শতাধিক অনুৰাগী, বিষয়া আৰু খেলুৱৈ সমবেত হয়।
বড়োলেণ্ডৰ যুৱ খেলুৱৈৰ আদৰ্শ বড়োৱে অসম একাদশ এফ চি আৰু বড়োলেণ্ড এফ চিৰ মাজত এখন প্ৰদৰ্শনীমূলক খেলত অন্তিমখন খেল খেলিছিল। সতীৰ্থসকলৰ সৈতে খেলপথাৰলৈ ওলাই আহি শেষবাৰৰ বাবে ফুটবলৰ প্ৰতি থকা আকৰ্ষণ প্ৰদৰ্শন কৰে। আৱেগিক মুহুৰ্তত খেলুৱৈ গৰাকীয়ে কয়, “ফুটবল মোৰ জীৱন হৈ আহিছে। মৰম আৰু সহায়ৰ বাবে মই কৃতজ্ঞ। মই গৌৰৱ আৰু আনন্দৰে অৱসৰ লৈছো।” স্থানীয় লীগৰ পৰা ৰাষ্ট্ৰীয় খ্যাতিলৈ তেওঁৰ যাত্ৰাই অসমৰ যুৱ প্ৰতিভাক অনুপ্ৰাণিত কৰিছে।
অনুষ্ঠানত সাংসদ জয়ন্ত বসুমতাৰী, বিধায়ক লৰেন্স ইছলেৰী আৰু অসম ফুটবল সন্থাৰ সম্পাদক সাংগাৰং ব্ৰহ্মই শ্ৰদ্ধা জ্ঞাপন কৰে। অসমত ফুটবলৰ জনপ্ৰিয়তা বৃদ্ধি কৰাৰ লগতে যুৱ খেলুৱৈক অনুপ্ৰাণিত কৰাৰ বাবে বড়োক প্ৰশংসা কৰে। অৱসৰৰ পিছত খেলুৱৈগৰাকীয়ে যুৱ প্ৰশিক্ষক কাৰ্যসূচীত যোগদান কৰাৰ লগতে তেওঁৰ অভিজ্ঞতা ভাগ-বতৰা কৰাৰ সন্দৰ্ভত আলোচনা চলিছে।
