মহাকাশপ্ৰেমীসকলৰ বাবে আহিছে এক বৃহৎ সুযোগ। ২৫ এপ্ৰিল শুকুৰবাৰে পুৱা আকাশত এটা বিৰল মহাজাগতিক দৃশ্য দেখা যাব—যিটো দেখা যাব হুবহু ‘স্মাইলী ফেচ’ৰ দৰে।
এই দিনটোত শুক্ৰ, শনি আৰু শীৰ্ণ হৈ অহা অৰ্ধচন্দ্ৰই একেলগে এডাল সৰলৰেখাত অৱস্থান কৰিব।
আকাশত যেতিয়া তিনিটা মহাজাগতিক বস্তু একেলগে নিবিড়ভাৱে দেখা যায়, তেতিয়া ইয়াক জ্যোতিৰ্বিজ্ঞানীৰ ভাষাত ত্ৰিগুণ সংযোগ (ত্ৰিপল কনজাংছ) বুলি কোৱা হয়। সেইদিনা শুক্ৰ এটা চকু হ’ব, শনি হ’ব আনটো চকু আৰু অৰ্ধচন্দ্ৰ হ’ব সেই হাঁহিমুখীয়া মুখখনৰ ওঁঠ।
নাছাৰ ছোলাৰ ছিষ্টেমৰ এম্বেছাদৰ ব্ৰেণ্ডা কালবাৰ্টছনে কয় যে পূবৰ আকাশত শুক্ৰ গ্ৰহ অলপ ওপৰত, শনি অলপ তলত আৰু কাঁচি জোনটো অলপ উত্তৰ দিশত থাকিব। এই তিনিটা উজ্জ্বল বস্তুক একেলগে এটা মনোমোহা হাঁহিৰ দৰে দেখা যাব।
এই দৃশ্য পৃথিৱীৰ যিকোনো ঠাইৰ পৰাই দেখা যাব, যদিহে আকাশ পৰিষ্কাৰ আৰু পূব দিগন্ত স্পষ্টকৈ দেখা যায়। এই দৃশ্যটো সূৰ্য্য উদয়ৰ এঘণ্টা আগতে ভালদৰে দেখা পোৱা যাব। সেয়ে, যিসকলে চাব বিচাৰে সেইদিনা ৰাতিপুৱা পূব দিশলৈ চাই থাকিব লাগিব।
শুক্ৰ আৰু শনি সহজে দেখা যাব। অৱশ্যে টেলিস্কোপ বা তৰা চোৱা বাইনোকুলাৰ ব্যৱহাৰ কৰাসকলে অৰ্ধচন্দ্ৰৰ স্পষ্ট ৰূপ দেখিবলৈ সক্ষম হ’ব।
আন এটা আচৰিত কথা হ’ল যে লিৰিড উল্কাবৃষ্টি শিখৰত উপনীত হোৱাৰ ঠিক পিছতেই এই মহাজাগতিক ‘স্মাইলী ফেচ’ দেখা যাব। ফলত সেই নিশা আকাশজুৰি দেখা যাব পোহৰ আৰু জিলিকনিৰ এক ব্যতিক্ৰমী উৎসৱ।
