১৮৪৮ চনৰ ২১ ফেব্ৰুৱাৰীত প্ৰকাশ পাইছিল বিশ্বত আলোড়ন সৃষ্টি কৰা যুগান্তকাৰী গ্ৰন্থ – কাৰ্ল মাৰ্ক্স আৰু ফ্ৰেডৰিক এংগেলছৰ কমিউনিষ্ট ইস্তাহাৰ। অন্যহাতে ২১ ফেব্ৰুৱাৰী দিনটো ইউনেস্কোই ভাষিক আৰু সাংস্কৃতিক বৈচিত্ৰ্যক উদযাপনৰ বাবে আন্তঃৰাষ্ট্ৰীয় মাতৃভাষা দিৱস হিচাপে ১৯৯৯ চনত ঘোষণা কৰিছে।এই দুয়োটা দিশ সামৰি ২০১৯ চনৰ ২১ ফেব্ৰুৱাৰীত, লেফ্ট ৱৰ্ডছ বুক্ছকে ধৰি ভাৰতৰ প্ৰগতিবাদী প্ৰকাশন গোষ্ঠী কেইটামানৰ গোট – ইণ্ডিয়ান ছ’চাইটি ফৰ লেফট পাব্লিছাৰ্ছে নিজ নিজ ভাষাত কমিউনিষ্ট ইস্তাহাৰ সমূহীয়াকৈ পঢ়িবলৈ আহ্বান জনাই ৰেড বুক্ছ ডে’ অনুষ্ঠানৰ সূচনা কৰে।
ৰেড বুক্ছ ডে‘ৰ আয়োজনে শীঘ্ৰেই বিশ্বজুৰি প্ৰকাশকসকলৰ দৃষ্টি আকৰ্ষণ কৰে আৰু ২০২০ চনত দক্ষিণ কোৰিয়াৰ পৰা কিউবালৈকে ৩০,০০০তকৈও অধিক লোকৰ অংশগ্ৰহণেৰে উদযাপন কৰা হয়। ২০২০ চনত ৰেড বুকছ ডেৰ প্ৰথম আন্তৰ্জাতিক উদযাপনৰ প্ৰস্তুতিৰ বাবে, ইণ্ডিয়ান ছ’চাইটি অফ লেফ্ট পাব্লিছাৰ্ছে বিশ্বজুৰি প্ৰকাশকসকলৰ সভা আহ্বান কৰে। এই সভাসমূহে ইণ্টাৰনেশ্যনেল ইউনিয়ন অফ লেফ্ট পাব্লিছাৰ্ছ (আইইউএলপি)ৰ সৃষ্টি হয় য’ত এতিয়া পঞ্চল্লিশটা প্ৰকাশক অন্তৰ্ভুক্ত হৈছে। ২০২৪ চনলৈ ৰেড বুক্ছ ডে’ত অসমকে ধৰি ভাৰতৰ বিভিন্ন ৰাজ্যৰ লগতে আন্তৰ্জাতিকভাৱে ইণ্ডোনেছিয়াৰ পৰা চিলিলৈ, চীনৰ পৰা তুৰষ্কলৈ, মালয়েছিয়াৰ পৰা ব্ৰাজিললৈ, অষ্ট্ৰেলিয়াৰ পৰা আমেৰিকালৈ দহ লাখতকৈও অধিক লোকে অংশগ্ৰহণ কৰে।
ভাৰতত কৃষক সংগঠন আৰু ট্ৰেড ইউনিয়নৰ সদস্যসকলে বিভিন্ন গাঁৱত কমিউনিষ্ট মেনিফেষ্টো আলোচনা কৰাৰ বিপৰীতে মাজতে ব্ৰাজিলৰ লেণ্ডলেছ ৱৰ্কাৰ্ছ মুভমেণ্টৰ সদস্যসকলে একেলগে বহি কাৰ্নিভাল উৎসৱৰ সময়ত পৰ্যায়ক্ৰমে কমিউনিষ্ট মেনিফেষ্টখন সমূহীয়াকৈ পঢ়ে। নেপালত কৃষি কৰ্মী সংঘই বিভিন্ন প্ৰগতিশীল কিতাপৰ বিষয়ে আলোচনা কৰে। আনহাতে টানজানিয়াৰ ভূমিহীন কৃষকসকলে সাক্ষৰতাৰ গুৰুত্বৰ বিষয়ে আলোচনা কৰে। ২০২৩ চনত কিউবাৰ দহদিনীয়া হাভানা বুক ফেয়াৰত ২১ ফেব্ৰুৱাৰীত ৰেড বুক্ছ ডে’ৰ বিশেষ অনুষ্ঠানমালাৰ বাবে সংৰক্ষিত কৰা হয়।
আইইউএলপি গঠন কৰা হৈছিল কেৱল ৰেড বুক্ছ ডে’ প্ৰচাৰ কৰাৰ বাবেই নহয়, বৰঞ্চ এক বৃহত্তৰ প্লেটফৰ্ম প্ৰদান কৰাৰ বাবেও যাতে বাঁওপন্থী প্ৰকাশকসকলে সোঁপন্থীৰ আক্ৰমণৰ পৰা ৰক্ষা পৰে আৰু যুক্তিসংগত আৰু সমাজবাদী ধাৰণা আগবঢ়ায়।
আইইউএলপিয়ে ৰোমানিয়ানৰ পৰা ইণ্ডোনেছিয়ালৈকে বিভিন্ন ভাষাত একেদিনেই কেইবাটাও যুটীয়া কিতাপ প্ৰস্তুত কৰিছে (চে গুৱেৰাৰ ৰচনা, পেৰিছ কমিউনৰ স্মৰণ আদি) আৰু এই সময়ত বিভিন্ন লেখক আৰু প্ৰকাশকসকলে আক্ৰমণৰ সন্মুখীন হ’লে তেওঁলোকক ৰক্ষা কৰিবলৈ বিবৃতিও জাৰি কৰিছে। গ্ৰন্থাগাৰ আন্দোলনক শক্তিশালী কৰাও হৈছে ৰেড বুকছ ডেৰ অন্যতম লক্ষ্য যাতে সমূহীয়া পঠন বৃদ্ধিৰে যুক্তি আৰু প্ৰগতিশীল চিন্তা চৰ্চা আগুৱাই যায়। ৰেড বুক্ছ ডে হৈছে প্ৰগতিশীল কিতাপ লিখা, প্ৰকাশ কৰা আৰু সকলোৰে পঢ়াৰ অধিকাৰ ৰক্ষা কৰা আৰু যুক্তিক নাশ কৰা সমকালীন অন্ধবিশ্বাসী ধাৰণাৰ বিৰুদ্ধে যুঁজ দিয়া এক বৃহত্তৰ সাংস্কৃতিক সংগ্ৰামৰ অংশ। আশা কৰা হৈছে যে এই দিনটো সকলো আইইউএলপি আৰু বাঁওপন্থী প্ৰবাহৰ বাহিৰত থকা ব্যক্তি আৰু সংগঠনসমূহে আঁকোৱালি ল’ব।
এইবেলি গুৱাহাটীত ডি ৱাই এফ আই আৰু নৱযুগ প্ৰকাশনে যৌথভাৱে ৰেড বুক্ছ ডে’ৰ সৈতে সংগতি ৰাখি ১৬ ফেব্ৰুৱাৰীত বিয়লি ৩ঃ৩০ বজাৰ পৰা চান্দমাৰী স্থিত পেঞ্চনাৰ ভৱনত “কমিউনিষ্ট ইষ্টাহাৰঃ এক নতুন পৃথিৱীৰ ৰূপৰেখা” শীৰ্ষক আলোচনা চক্ৰৰ আয়োজন কৰিছে। বক্তা হিচাপে উপস্থিত থাকিব বাঁওপন্থী দল চি পি আই(এম)ৰ ৰাজ্যিাক সম্পাদক সুপ্ৰকাশ তালুকদাৰ। ৪৫ মিনিটৰ বক্তৃতাৰ পিছত উপস্থিত ব্য্ক্তিসকলে ৩০ মিনিটৰ বাবে নিজৰ নিজৰ মত ডাঙি ধৰিব।আশা কৰিছোঁ আপোনালোকেও অনুষ্ঠানটোত উপস্থিত থাকি আন্তৰ্জাতিক ৰেড বুক্ছ ডে’ পালন কৰাৰ এই প্ৰচেষ্টা সফল কৰিব।
