পোহৰলৈ আহিল তৃণমূল কংগ্ৰেছৰ বিসম্বাদী ১৯ গৰাকী সাংসদৰ স্বাক্ষৰিত পত্ৰ, কাৰ কাৰ আছে নাম?
তৃণমূল কংগ্ৰেছ দলৰ ভিতৰচৰাত এক ডাঙৰ বিদ্ৰোহৰ সূচনা হৈছে। দলটোৰ ১৯ গৰাকী সাংসদে লোকসভাৰ অধ্যক্ষ ওম বিৰলাক এখন পত্ৰ প্ৰেৰণ কৰিছে বুলি জানিব পৰা গৈছে। এই পত্ৰখনত তেওঁলোকে ৰাষ্ট্ৰীয় গণতান্ত্ৰিক মিত্ৰজোঁট চমুকৈ এন ডি এ গোটত যোগদান কৰাৰ ইচ্ছা প্ৰকাশ কৰিছে। ইমান দিনে এই বিষয়টোক লৈ কেৱল চৰ্চা চলি আছিল যদিও এতিয়া সাংসদসকলৰ স্বাক্ষৰ সম্বলিত পত্ৰখন ৰাজহুৱা হোৱাৰ পিছত সকলো কথা স্পষ্ট হৈ পৰিছে। এই বিদ্ৰোহী সাংসদসকলৰ তালিকাত দেৱ, ৰচনা, জুন, সায়নী ঘোষ আৰু বাপী হালদাৰৰ দৰে প্ৰভাৱশালী ব্যক্তিসকলৰ নাম অন্তৰ্ভুক্ত আছে।
প্ৰাপ্ত খবৰ অনুসৰি যোৱা ৯ জুনত দিল্লীৰ কেন্দ্ৰীয় পৰিৱেশ মন্ত্ৰী ভূপেন্দ্ৰ যাদৱৰ আৱাসগৃহত অনুষ্ঠিত হোৱা এক বৈঠকত প্ৰথমে ১৪ গৰাকী সাংসদে এই পত্ৰখনত স্বাক্ষৰ কৰিছিল। পৰৱৰ্তী সময়ত মালা ৰায়, সায়নী ঘোষ, ইউচুফ পাঠান, মিতালী বাগ আৰু ৰচনা বেনাৰ্জীৰ দৰে আন পাঁচগৰাকী সাংসদেও ইয়াত স্বাক্ষৰ কৰে। ইয়াৰ ফলত বিদ্ৰোহী সাংসদৰ সংখ্যা ১৯ গৰাকীলৈ বৃদ্ধি পায়। বৰ্তমান এই বিষয়টোক লৈ ৰাজনৈতিক মহলত তীব্ৰ চাঞ্চল্যৰ সৃষ্টি হৈছে।
জানিব পৰা মতে অহা সোমবাৰে তৃণমূল কংগ্ৰেছৰ প্ৰায় ২০ গৰাকী সাংসদে লোকসভাৰ অধ্যক্ষ ওম বিৰলাক সাক্ষাৎ কৰাৰ সম্ভাৱনা আছে। তেওঁলোকে অধ্যক্ষগৰাকীক সাক্ষাৎ কৰি এন ডি এক সমৰ্থন কৰাৰ কথা আনুষ্ঠানিকভাৱে জনাব আৰু সংসদত তেওঁলোকৰ বহাৰ ব্যৱস্থা সুকীয়া কৰিবলৈ অনুৰোধ জনাব। এই উদ্দেশ্যে সাংসদসকল অহা দেওবাৰে নিশাৰ ভাগত দিল্লীত উপস্থিত হ’ব। সেইদিনা নিশাই তেওঁলোকৰ মাজত এক নৈশভোজৰ লগতে এক গুৰুত্বপূৰ্ণ বৈঠক অনুষ্ঠিত হ’ব য’ত তেওঁলোকে নিজৰ পৰৱৰ্তী ৰাজনৈতিক পদক্ষেপৰ বিষয়ে চূড়ান্ত সিদ্ধান্ত গ্ৰহণ কৰিব।