ৰাষ্ট্ৰীয় ঘাইপথৰ শেহতীয়া পৰিস্থিতিৰ বুজ ল’বলৈ দুদিনীয়া কাৰ্যসূচীৰে ডিমা হাচাও জিলাত বুধবাৰে উপস্থিত হৈছে জাপানীজ বিশেষজ্ঞৰ এটা দল।
ৰাষ্ট্ৰীয় ঘাইপথ প্ৰাধিকৰণ কৰ্তৃপক্ষৰ ৰিজ’নেল অফিচাৰ অলোক কুমাৰক লগত লৈ বিশেষজ্ঞৰ দলটোৱে পাৰ্বত্য জিলাৰ হাতিখালী, লাঙটিং, মাহুৰ আৰু জাতিংগা এলেকা পৰিদৰ্শন কৰে।
লাঙটিঙৰ ওচৰৰ হাতিখালী আৰু দিহাখু এলেকাত চাপৰে চাপৰে খহা ৰাষ্ট্ৰীয় ঘাইপথৰ উপৰি ভূমিস্খলন এলেকাৰ বুজ লয় জাপানীজ বিশেষজ্ঞ দলে। দলটোৱে খহি যোৱা ঘাইপথৰ চয়েল সংগ্ৰহ কৰে।
ইফালে যোৱা কিছুদিনত হোৱা নেৰানেপেৰা বৰষুণত লাঙটিং আৰু কালাচান্দৰ মাজৰ চাৰিলেনযুক্ত ঘাইপথৰ অধিক ক্ষতি হোৱা ঠাইত কেইবা ঘন্টা ধৰি পৰিদৰ্শন কৰে বিশেষজ্ঞ দলে।
ৰাষ্ট্ৰীয় ঘাইপথ প্ৰাধিকৰণৰ গুৱাহাটীত থকা ৰিজ’নেল কাৰ্যালয়ৰ চিফ জেনেৰেল মেনেজাৰ অলোক কুমাৰে কয় ‘ঘাইপথৰ প্ৰায় বিশ ফুট তলেৰে বৰষুণৰ পানী সোমাই ভূমিস্খলনৰ সৃষ্টি কৰে। যাৰ প্ৰত্যক্ষ প্ৰভাৱত পথ খহি যায়’।
কুমাৰে লগতে কয় যে জাপানীজ বিশেষজ্ঞ দলে মাটি খহি যোৱাৰ কাৰণ উদ্ভাৱন কৰাৰ উপৰি ইয়াৰ ট্ৰিটমেন্টৰ কাৰণে কি ব্যৱস্থা ল’ব লাগিব সেয়াও জনাব।
আজি বিশেষজ্ঞ দলটোৱে জাতিঙ্গা-হাৰাঙ্গাজাও পঁচিশ কিলোমিটাৰ এলেকা পৰিদৰ্শন কৰিব। পঁচিশ কিলোমিটাৰ অংশৰ বৰমুলকৈ, ৰেখ’ আৰু কাপুৰচেৰা এলেকাৰ ভূমিস্খলন প্ৰৱণতা এলেকাৰ বুজ ল’ব। লগতে ভৌগলিক অৱস্থানো চোৱা হ’ব আৰু এই পৰিদৰ্শনৰ পাছত নতুনকৈ ঘাইপথ নিৰ্মাণৰ ডিপিআৰ প্ৰস্তুত কৰিব নাহাই(NHAI)এ।
সংবাদ মাধ্যমৰ লগত হোৱা সাক্ষাৎকাৰত চিফ জেনেৰেল মেনেজাৰ অলোক কুমাৰে কয় যে জাতিঙ্গা-হাৰাঙ্গাজাও বৰ্তমান পথ সংস্কাৰৰ কাৰণে কেন্দ্ৰীয় চৰকাৰে ৫৪ কোটি টকাৰ অনুদান দিছে।
ইতিমধ্যে নিবিদা আহ্বানৰ কাম সম্পূৰ্ণ হৈছে। এনে পৰিপ্ৰেক্ষিতত ডিচেম্বৰৰ প্ৰথম সপ্তাহত সংস্কাৰৰ কাম আৰম্ভ হোৱা সম্ভৱ হ’ব।
উল্লেখনীয় যে আজি নাহাইৰ চিজিএম অলোক কুমাৰে ছাত্ৰ সংগঠন ইণ্ডিজেনাছ ষ্টুডেণ্ট ফ’ৰামৰ প্ৰতিনিধিৰ সৈতে জাতিঙ্গাত ঘাইপথ সম্পৰ্কে এখন বৈঠকত মিলিত হয়।
