চাৰিওফালে পানীl বিশাল ব্ৰহ্মপুত্ৰৰ বানত বিধস্ত সকলোl
নিজৰ গাঁওখন, ঘৰখনো পানীৰ তলত। সতি সন্তানক লৈ দুৰ্বিসহ জীৱন কটাইছে পৰিয়ালটোৱে।
কিন্তু নিজৰ ব্যক্তিগত জীৱনকো তুচ্ছ কৰি দায়িত্ব পালনত ব্যস্ত যোৰহাট জিলাৰ টীয়কৰ এগৰাকী আশা কৰ্মী, নাম দীপিকা মিলি।
টীয়ক পৰ্বতীয়া গাঁৱৰ এটা পৰিয়ালৰ দুজন যুৱক আহিছিল বহি: ৰাজ্যৰ পৰা। ফলত হোম কোৱাৰেন্টাইনত আছিল পৰিয়ালটো।
কিন্তু যোৱা তিনিদিন ধৰি বাঢ়নী পানীৰ কবলত পৰা পৰিয়ালটোৰ অৱস্থাৰ বুজ ল’বলৈ এখন টুলুঙা নাৱৰে পৰিয়ালটোৰ কাষত থিয় হৈ অৱস্থাৰ বুজ ল’বলগা হৈছে এইগৰাকী ক’ৰণা যোদ্ধাই।
নিজৰ দায়িত্বৰ প্ৰতি অতি সচেতন আশা কৰ্মী গৰাকীয়ে ক’লে চৰকাৰে যি দায়িত্ব দিছে সেয়া তেওঁ পালন কৰিছে, ভয় লাগিলেও নিজৰ দ্বায়িত্ব পালন কৰিব লাগিব।
সীমিত সা-সুবিধাৰ মাজতো দীপিকাৰ দৰে ক’ভিড-১৯ ৰ প্ৰতিৰোধী সংগ্ৰামত ব্ৰতী এই যোদ্ধাসকল স্বাভাৱিকতে প্ৰশংসাৰ পাত্ৰ আৰু আদৰ্শ।
ক’ভিড-১৯ ৰ এই সংগ্ৰামত এচাম নিস্বাৰ্থ কৰ্মীৰ অৱদান নিজ চক্ষুৰে নেদেখিলে বুজিবলৈ কঠিন l
