শিৱসাগৰৰ নাজিৰাত ভয়ংকৰ দুৰ্ঘটনা; ডাম্পাৰৰ খুন্দাত ছাত্ৰৰ মৃত্যু
শিৱসাগৰ জিলাৰ নাজিৰাৰ কলেজ তিনি আলিত ডাম্পাৰৰ খুন্দাত এজন স্কুলীয়া ছাত্ৰৰ মৃত্যু হোৱা ঘটনাই তীব্ৰ চাঞ্চল্যৰ সৃষ্টি কৰিছে। মৃত যুৱকজনৰ নাম শ্ৰুতানিক কাশ্যপ।
জানিব পৰা মতে, দেউতাকৰ বন্ধু ৰমেশ গগৈ (৪৩)ৰ সৈতে স্কুটিত (AS-04-Q-5804) টিউচনলৈ গৈ থকা অৱস্থাত পিছফালৰ পৰা ডাম্পাৰে খুন্দা মৰাত দুয়ো পথৰ ওপৰত বাগৰি পৰে। লগে লগে স্থানীয় ৰাইজে দুয়োকে শিৱসাগৰ অসামৰিক চিকিৎসালয়লৈ নিয়ে যদিও চিকিৎসকে শ্ৰুতানিক কাশ্যপক (১৫) মৃত ঘোষণা কৰে।
শ্ৰুতানিক কাশ্যপ নাজিৰাৰ কেন্দ্ৰীয় বিদ্যালয়ৰ দশম শ্ৰেণীৰ ছাত্ৰ।
আনহাতে দুৰ্ঘটনাটোত গুৰুতৰভাৱে আহত হোৱা ৰমেশ গগৈ শিৱসাগৰ অসামৰিক চিকিৎসালয়ত চিকিৎসাধীন হৈ আছে।
দুৰ্ঘটনা সংঘটিত কৰিয়েই ঘটনাস্থলীৰ পৰা পলায়ন কৰা ডাম্পাৰখনৰ সন্ধানত অভিযান আৰম্ভ কৰিছে নাজিৰা আৰক্ষীয়ে।
নাজিৰা দেওধাই পথৰ শ্যামল হাতীকাকতি আৰু নাজিৰা পৌৰসভাৰ উপ পৌৰপতি ৰূপাঞ্জলী হাতীকাকতিৰ এক মাত্ৰ পুত্ৰ আছিল শ্ৰুতানিক কাশ্যাপ।
ইফালে নাজিৰাৰ লক্ষ্মীজান আৰু বিহুবৰৰ পৰা শিল কঢ়িওৱা ডাম্পাৰৰ দৌৰাত্ম্যৰ বাবেই আজি ছাত্ৰজনে মৃত্যুক আকোৱালি ল’ব লগীয়া হয় বুলি অঞ্চলবাসীয়ে ক্ষোভ প্ৰকাশ কৰিছে।