শিৰোনাম দখলকাৰী “অস্ত্ৰধাৰী দৰা-কইনা”ৰ বাতৰিক লৈ নাগা বিদ্ৰোহী এন এচ চি এন (ইউনিফিকে’চন)এ শুকুৰবাৰে সংবাদ মাধ্যমক চোকা সমালোচনা কৰিছে।
সংগঠনটোৱে জাৰি কৰা বিবৃতিত কৈছে, নাগালেণ্ডৰ চ’চিয়েল মিদিয়া আৰু ভাৰতৰ প্ৰিণ্ট আৰু ইলেকত্ৰনিক মিদিয়াই এই বাতৰিৰ যোগেদি সংবাদ পৰিৱেশনক এক “নতুন উচ্চতা” বা “অতি নিম্নমান”লৈ লৈ গ’ল।
সংগঠনটোৱে কয়, “এখন অক্ষতিকাৰক বিবাহৰ ছবি”ক এনে ধৰণে দুৰ্ব্যৱহাৰ আৰু অপৰাধীকৰণ কৰা হ’ল যেন দৰা-কইনাহালে “আন এক ৱৰ্ল্দ ত্ৰে’দ চেন্তাৰ ধ্বংস কৰিলে বা আটাইতকৈ দুৰ্ধৰ্ষ সন্ত্ৰাসবাদী দম্পত্তি এহালকহে যেন বিয়াৰ সাজত ৰাইফলৰ সৈতে ধৰা হ’ল।”
দৰাৰ দেউতাক বহত’ কিবা সংগঠনটোৰ নিজা চৰকাৰৰ (GPRN) গৃ্হ মন্ত্ৰী আৰু তেওঁ “ৰেদ আইদেণ্টিটি কাৰ্দধাৰী” হোৱাৰ কথা উল্লেখ কৰি কোৱা হৈছে যে বিয়াত একান্তই ব্যক্তিগত পৰ্য্যায়ত অনুমতি থকা বন্দুককেইটাৰ সৈতে ছবিখন তোলা হৈছিল।
আৰু কোনোবাই সেই ছবি ৱটচএপত ফৰৱাৰ্দ কৰিলে আৰু নাগালেণ্ডত ভাইৰেল হৈ পৰিল।
ভাৰতীয় সংবাদ মাধ্যমক সমালোচনা কৰি তেওঁলোকে প্ৰশ্ন তুলিছে, ছবিখনক লৈ ইমান গুৰুত্বৰে বাতৰি প্ৰচাৰ কৰাসকল ডিমাপুৰৰ শেহতীয়া বানপানীৰ সময়ত ক’ত আছিল?
বিয়াৰ ছবি এখনক ভাৰত ৰাষ্ট্ৰৰ বিৰুদ্ধে অপৰাধ বুলি ধৰা উচিত নহয় বুলিও মন্তব্য কৰিছে আৰু কৈছে, বহুলোকৰ এনে ফটো তেওঁলোকে দেখুৱাব পাৰিব আৰু তেতিয়া প্ৰশাসনে একেই পদক্ষেপ ল’বনে?
ডিমাপুৰ আৰক্ষীয়ে ১৩ নৱেম্বৰত ঘটনা সংক্ৰান্তত সংগঠনটোৰ এত’ চুমি আৰু মুগাহ’ নামৰ দুজন সদস্যক গ্ৰেপ্তাৰ কৰিছিল।
দৰা-কইনাহালকো গ্ৰেপ্তাৰ কৰা হৈছিল কিন্তু পিছত তেওঁলোকক জামিনত মুকলি কৰি দিয়া হয়।
অস্ত্ৰধাৰী দৰা-কইনাৰ ছবিয়ে সংবাদশীৰ্ষ দখল কৰাৰ পিছত নাগালেণ্ডৰ আৰক্ষী সঞ্চালকপ্ৰধান টি জং লংকুমেৰে ব্যৱস্থাগ্ৰহণৰ নিৰ্দেশ দিয়া বুলি বাতৰিত প্ৰকাশ।
নাগালেণ্ডৰ ৰাজ্যপাল আৰ এন ৰৱিয়েও ইতিমধ্যে আৰক্ষী সঞ্চালকপ্ৰধানক ঘটনাটো সন্দৰ্ভত “এটা অপৰাধমূলক গোচৰ পঞ্জীয়ন, বন্দুকসমূহ জব্দ আৰু দুষ্কৃতিকাৰীক গ্ৰেপ্তাৰ” কৰিবলৈ নিৰ্দেশ দিছিল।
দৰা-কইনাৰ ছবিখনত দুয়ো এ কে ৫৬ আৰু এম ১৬ বন্দুক লৈ থকা দেখা গৈছিল।
দৰাৰ লগতে কইনাৰ দেউতাকো সংগঠনটোৰ এজন শীৰ্ষ নেতা।
যোৱা ৯ নৱেম্বৰত ডিমাপুৰৰ ৫ মাইলত বিয়াখনৰ অভ্যৰ্থনা অনুষ্ঠিত হৈছিল।
এন এছ চি এন (আই এম) আৰু এন এছ চি এন (কে)ৰ মাজত হোৱা বিভাজন আঁতৰোৱাৰ লক্ষ্যৰে ২০০৭ চনত এন এছ চি এন (ইউ) গঠন হৈছিল।