তামুলপুৰৰ কচুবাৰীত অঘটন! পানীত পৰি সন্ধানহীন ১৬ বছৰীয়া কিশোৰ
তামুলপুৰৰ কচুবাৰীত পানীত পৰি সন্ধানহীন কিশোৰ(ইনছেটত)। ফটো: নৰ্থইষ্ট নাও।
কচুবাৰীৰ সৌৰাগুৰীত শুকুৰবাৰে সন্ধিয়া এটা দোঙৰ পানীত পৰি সন্ধানহীন হৈ পৰিছে দেৱজিত দে’ নামৰ ষোল্ল বছৰীয়া এটি কিশোৰ।
কিশোৰ গৰাকীয়ে তেওঁৰ আন দুজন বন্ধুৰ সৈতে এখন স্কুটিৰে আহি কচুবাৰী সৌৰাগুৰীত কেঁকুৰী এটা পাৰ হওঁতে তীব্ৰবেগেৰে বিদ্যুতৰ খুটাত খুন্দা মাৰে আৰু নিয়ন্ত্ৰণ হেৰুৱাই তিনিও গৰাকী কিশোৰ পানীত পৰি যায়।
তিনিওজনকে পানীৰ ঢলে উটুৱাই লৈ যায় যদিও স্থানীয় ৰাইজে দুগৰাকী কিশোৰক জীৱন্তে উদ্ধাৰ কৰিবলৈ সক্ষম হয়।
আনহাতে, দেৱজিত দে’ নামৰ কিশোৰজনৰ এতিয়াও সন্ধান ওলোৱা নাই।
এই ঘটনাৰ পিছতে সমগ্ৰ অঞ্চলটোত হাঁহাকাৰ পৰিস্থিতিৰ সৃষ্টি হয়। খবৰ পোৱাৰ পিছতে তামুলপুৰ আৰক্ষী, স্থানীয় ৰাইজ আহি ঘটনাস্থলীত উপস্থিত হয়।
আৰক্ষী প্ৰশাসনৰ উদ্যোগত অগ্নিনিৰ্বাপক আৰু জৰুৰীকালীন সেৱাৰ এটি দলে নিশালৈকে দোংটোত কিশোৰজনক বিচাৰি অভিযান চলায় যদিও সন্ধান উলিয়াব নোৱাৰিলে দেৱজিতৰ।
আজিও দোংটোত উদ্ধাৰ অভিযান চলোৱা হব।