ভাৰতীয় সেনাৰ ৰেডহৰ্ন ডিভিজনৰ কোকৰাঝাৰত মোতায়েন গোটটোৱে সোমবাৰে জিলাখনৰ ঝাৰবৰি হাইস্কুলত এটা অংগদান সচেতনতা আৰু চিকিৎসা শিবিৰৰ আয়োজন কৰে।
এই অংগদান সচেতনতা আৰু চিকিৎসা শিবিৰটোত গাঁৱ বয়োজ্যেষ্ঠ, ছাত্ৰ-ছাত্ৰী, অৱসৰপ্ৰাপ্ত সেনা বাহিনীৰ লোক আৰু অন্যন্য লোকসহ ২০০ৰো অধিক স্থানীয় লোকে যোগদান কৰে।
এগৰাকী সেনা চিকিৎসকে অংগদান আৰু ইয়াৰ প্ৰক্ৰিয়াৰ ওপৰত বিশদভাৱে ব্যাখ্যা কৰে। তাৰ পাছত এটা স্বাস্থ্য পৰীক্ষা কাৰ্যসূচীৰ আয়োজন কৰা হয়। ইয়াত স্থানীয় লোকসকলৰ বিভিন্ন অসুখৰ পৰীক্ষা কৰাৰ লগতে চিকিৎসা সেৱাও আগবঢ়োৱা হয়।
এই সৰু-সুৰা স্বাস্থ্য পৰীক্ষা শিবিৰসমূহত আগবঢ়োৱা চিকিৎসা সেৱাই চৰকাৰৰ মনোযোগৰ পৰা নিলগত থকা এনেধৰণৰ এলেকাসমূহৰ সাৰ্বিক স্বাস্থ্য সেৱা উন্নীত কৰাৰ ক্ষেত্ৰত এটা গুৰুত্বপূৰ্ণ ভূমিকা পালন কৰে।
