পাক নৌসেনাৰ হাতত বন্দী গুজৰাটত কৰ্মৰত মেৰাপানীৰ সীমান্ত শইকীয়া
গুজৰাটত কৰ্মৰত মেৰাপানীৰ এজন যুৱক মাছমৰীয়া জাহাজসহ পাকিস্তানৰ নৌ-সেনাৰ হাতত কৰায়ত্ত হৈ থকাৰ বাতৰিয়ে পৰিয়ালটোক উদ্বিগ্ন কৰি তুলিছে।
জানিব পৰা মতে মেৰাপানীৰ নৱগ্ৰামৰ প্ৰদীপ শইকীয়াৰ সন্তান সীমান্ত ওৰফে চিমন্তই চাৰি মাহ পূৰ্বে গুজৰাটত কৰ্মসংস্থাপন বিচাৰি সাগৰত মাছমৰা জাহাজত সহায়ক হিচাপে কাম কৰি আছিল। মুঠ ২২জন ব্যক্তিসহ এই মাছমৰীয়া জাহাজখনে সাগৰত মাছ মাৰি থকা অৱস্থাতে নিশাৰ ভাগত ভুলক্ৰমে ভাৰত-পাকিস্তানৰ আন্তঃৰাষ্ট্ৰীয় সীমান্ত অতিক্ৰম কৰি যোৱাৰ বাবে পাকিস্তানৰ নৌ-সেনাই জাহাজসহ আটাইকেইজন ভাৰতীয়কে আটক কৰে।
ইপিনে, অন্ধ্ৰ প্ৰদেশত কৰ্মৰত সীমান্তৰ ককায়েকৰ পৰা এই ঘটনা সন্দৰ্ভত জানিব পাৰি পৰিয়ালটো উদ্বিগ্ন হৈ পৰিছে। এটি এমহীয়া সন্তানৰ পিতৃ সীমান্তৰ পত্নী আৰু পিতৃ-মাতৃয়ে পাকিস্তানত কাৰাৰুদ্ধ হৈ থকা সীমান্তৰ অনিশ্চিত ভৱিষ্যতক লৈ ভাগি পৰিছে।
আনহাতে, মেৰাপানীৰ সীমান্তকে ধৰি আন ২২জন ভাৰতীয় লোকক পাকিস্তান চৰকাৰে এতিয়াও মুকলি কৰি দিয়া নাই। সীমান্তৰ পৰিয়ালে পুত্ৰৰ মুক্তিৰ বাবে মেৰাপানী আৰক্ষী থানাত জনোৱাৰ উপৰি ভাৰত চৰকাৰৰ বিদেশ মন্ত্ৰ্যালয়ৰ সহযোগিতা কামনা কৰিছে।