ৰাজ্যসভাত কোনো কাৰণতে যাতে নাগৰিকত্ব সংশোধনী বিধেয়ক গৃহীত হ’ব নোৱাৰে তাৰ বাবে দিল্লীৰ ৰাজনৈতিক মহলত প্ৰচেষ্টা অব্যাহত ৰাখিছে আছু আৰু নেছ’ই।ৰাজ্যসভাত বিধেয়ক বিৰোধিতাৰ প্ৰসংগ লৈ আজি দিল্লীত আছু আৰু নেছ’ৰ এটা প্ৰতিনিধি দলে ভাৰতবৰ্ষৰ বিভিন্ন ৰাষ্ট্ৰীয় আৰু আঞ্চলিক দলৰ নেতৃত্বৰ সৈতে আলোচনাত মিলিত হয়।
১৩ ফেব্ৰুৱাৰিৰ পৰা অনুষ্ঠিত হ’ব লগীয়া ৰাজ্যসভাৰ অধিবেশনৰ সময়ত বিধেয়কখন গৃহীত কৰাৰ ক্ষেত্ৰত ফলপ্ৰসূ পদক্ষেপ গ্ৰহণ কৰাৰ ক্ষেত্ৰত ৰাজনৈতিক দলৰ সদস্যসকলক সদন ত্যাগ নকৰি সংসদত উপস্থিত থাকি বিধেয়কখনৰ বিপক্ষে ভোটদান কৰি বিধেয়কখন বাতিল কৰাৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰাৰ বাবে আহ্বান জনাইছে।
নেছ’ৰ অধ্যক্ষ চেমুৱেল জেৰৱা, উপদেষ্টা সমুজ্জ্বল কুমাৰ ভট্টাচাৰ্য্য, আছুৰ সভাপতি,সম্পাদক দিপাংক কুমাৰ নাথ আৰু লুৰিণ জ্যোতি গগৈ সমন্বিতে খাছি ছাত্ৰ সন্থা, সদৌ মণিপুৰ ছাত্ৰ সন্থা, নগা ছাত্ৰ ফেডাৰেছন, ত্ৰিপুৰা ছাত্ৰ ফেডাৰেছন আৰু গাৰো ছাত্ৰ সন্থাৰ প্ৰতিনিধিৰ দলটোৱে আজি নিতিশ কুমাৰৰ নেতৃত্বাধীন জেডি(ইউ)ৰ সদস্য কে চি ত্যাগী, সমাজবাদী পাৰ্টিৰ নেতা জে পি চিৰ সদস্য জাভেদ আলি খান, বি পি এফৰ সদস্য বিশ্বজিৎ দৈমাৰী মধ্যপ্ৰদেশৰ ৰাজ্যসভাৰ সাংসদ তিৰুচি শিৱা আৰু ডি এম কে দলৰ সদস্যৰ লগত পৃথকে পৃথকে আলোচনাত মিলিত হয়।
এন ডি এৰ সহযোগি জে ডি(ইউ)ৰ নেতা কে চি ত্যাগীয়ে পুনৰবাৰ বলিষ্ঠভাৱে বিধেয়কৰ বিৰোধিতা কৰি ভোট প্ৰদান কৰিব বুলি প্ৰতিশ্ৰুতি দি আন আন দলৰ সৈতেও এই বিষয়ত আলোচনা অব্যাহত ৰাখিছে বুলি মন্তব্য কৰে।আনহাতে সমাজবাদী দলৰ জাভেদ আলী খানেও তেওঁলোকৰ দলে ৰাজ্যসভাত বিধেয়কৰ বিপক্ষে ভোট দি বিৰোধিতা কৰিব বুলি কথা দিয়ে।
সন্ধিয়া আছু আৰু নেছ’ৰ প্ৰতিনিধিৰ দলটোৱে মেঘালয়ৰ মুখ্যন্ত্ৰী কনৰাড চাংমা আৰু উত্তৰপূৰ্বাঞ্চলৰ আঞ্চলিক ৰাজনৈতিক দলৰ নেতাসকলৰ সৈতে এখন গুৰুত্বপূৰ্ণ বৈঠকত মিলিত হয়।
অসম আৰু উত্তৰ-পূৰ্বাঞ্চল জনসাধাৰণৰ বিৰোধিতা সত্ত্বেও কেন্দ্ৰ চৰকাৰে কূট কৌশলেৰে বিধেয়কখন জাপি দিবলৈ চেষ্টা চলাই আছে বুলি নেছ’ আৰু আছুৰ প্ৰতিনিধি দলটোৱে ক্ষোভেৰে মন্তব্য কৰে।
