অসমত ক’ভিদ-১৯-ত আক্ৰান্ত হোৱা প্ৰথম গৰাকী ব্যক্তি চিনাক্ত হোৱাৰ পাছত পিছতে ৰাজ্যৰ জনসাধাৰণক অধিক সজাগ-সচেতন হোৱাৰ বাবে আহ্বান জনাইছে সদৌ অসম ছাত্ৰ সন্থাৰ সাধাৰণ সম্পাদক লুৰিণজ্যোতি গগৈয়ে।
নিজৰ ফেইচবুক পেইজৰ জৰিয়তে প্ৰতিক্ৰিয়া প্ৰকাশ কৰি গগৈয়ে ৰাইজক আহ্বান জনায় কয়, ‘‘বৰ্তমান সময় বিশ্বৰ লগতে অসমৰ জনতাৰ বাবে এক জটিল সন্ধিক্ষণ। সাৱধান-সজাগ হৈ থাকিব লাগিব। সকলোৱে ভয় পৰিহাৰ কৰি নিজৰ ঘৰৰ ভিতৰতে থাকক।স্বাস্থ্য বিভাগে দিয়া সকলো বিধি-বিধান সতৰ্কতাৰে গ্ৰহণ কৰক আৰু আনকো এই সম্পৰ্কত সজাগ-সচেতন কৰক।’’
আনহাতে, বহিঃৰাজ্যৰ পৰা ঘৰলৈ ঘুৰি অহা কোনো লোকে নিজৰ ভ্ৰমণ পৰিক্ৰমা গোপনে নাৰাখি প্ৰয়োজনীয় স্থাস্থ্য পৰীক্ষা কৰাৰ বাবেও গগৈয়ে সকলোকে আহ্বান জনায়।
তদুপৰি, অসমৰ বাহিৰত থকা ব্যক্তি সকলৰ লগত যোগসূত্ৰ স্থাপন কৰা বাবে চৰকাৰৰ ব্যৱস্থা গ্ৰহণ কৰা বুলিও আছুৰ সাধাৰণ সম্পাদক গৰাকীয়ে কয়।
“এই সময় সজাগ-সচেতন আৰু সত্য নুলুকুৱাৰ সময়। মানুহৰ পৰা মানুহলৈ বিয়পাৰ পৰিৱেশ যাতে ভাইৰাছ বিধক কোনেও নিদিও তাৰ বাবে ক’ভিদ-১৯-ৰ শিকলি ডাল ভাঙি পেলাব লাগিব,” গগৈয়ে লগতে কয়।
নিজৰ নিজৰ অঞ্চলত যদি কোনো ব্যক্তি বাহিৰ পৰা আহি মনে-মনে ঘৰত যদি সোমাই আছে তেন্তে তেনে ব্যক্তিৰ খবৰ স্থানীয় ৰাইজে আৰক্ষী-প্ৰশাসনক দিয়াৰ বাবেও আহ্বান জনায় সদৌ অসম ছাত্ৰ সন্থাৰ নেতা লুৰিণ জ্যোতি গগৈয়ে।
ছাত্ৰ সন্থাৰ কৰ্মকৰ্তা সকলকো এই ক্ষেত্ৰত প্ৰশাসনৰ সৈতে যোগাযোগ ৰক্ষা কৰিবলৈ তেওঁ অনুৰোধ কৰে।
