নগাঁৱৰ চামগুৰি আৰক্ষী থানাৰ অধীনৰ শালনা আৰক্ষী চকীৰ সন্মুখত অসম চাহ জনজাতি ছাত্ৰ সন্থাই আজি এক ব্যাপক প্ৰতিবাদী কাৰ্যসূচীৰূপায়ণ কৰে। আটছাৰ কলিয়াবৰ শাখা সমিটিৰ প্ৰায় শতাধিক নেতা-কৰ্মী আৰু একাংশ শ্ৰমিক মহিলা সমবেত হৈ অসম চাহ মজদুৰ সংঘৰ নগাঁও শাখাৰ কাৰ্য্যালয়ত একাংশ বিতৰ্কিত ব্যক্তিয়ে দুৰ্নীতি আৰু অৰাজকতা চলাই অহাৰ অভিযোগ তুলি উক্ত প্ৰতিবাদ সাব্যস্ত কৰে।
উল্লেখযোগ্য যে অসম চাহ মজদুৰ সংঘৰ নগাঁও শাখা বিতৰ্কিত সভাপতি বিন্দু গঞ্জু আৰু সচিব বিনয় ৰবিদাসৰ বিৰুদ্ধে অঞ্চলটোৰ ছাত্ৰ-ছাত্ৰীসকলক প্ৰদান কৰা জাতিৰ প্ৰ-পত্ৰ সমূহত চূড়ান্ত বিসংগতি তথা জালিয়াতি কৰাৰ এক গুৰুতৰ অভিযোগ আনিছে আটছাৰ নেতৃত্বই।
বিন্দু গঞ্জুক সমিতিৰ সমূহ সদস্যৰ সিদ্ধান্ত মৰ্মে নিলম্বিত কৰাৰ পিছতো তেওঁ সচিবৰ লগত গোপন মিতিৰালি কৰি সংঘৰ সমূহ কাৰ্যতে অনাধিকাৰ হস্তক্ষেপ কৰাৰো অভিযোগ আনিছে আটছাৰ নেতা কৰ্মীয়ে।
এই সমগ্ৰ বিসংগতিপূৰ্ণ ঘটনাৰ বিষয়ে সোধা-পোচাৰ বাবে আটছাৰ কলিয়াবৰ শাখা কমিটিৰ একাংশ নেতা-কৰ্মী শালনাস্থিত সংঘৰ কাৰ্যালয়লৈ যোৱাত গঞ্জু আৰু বিতৰ্কিত সচিব বিনয় ৰবিদাস খৰ্গগ্ৰস্ত হৈ শালনা আৰক্ষী চকীত এখন ভুৱা গোচৰৰ এজাহাৰ দাখিল কৰে। ইয়াকে কেন্দ্ৰ কৰি সম্প্ৰতি আটছাৰ নেতা-কৰ্মীসকল ক্ষুব্ধ হৈ পৰিছে।
যাৰ বাবে আটছাৰ কলিয়াবৰ শাখাৰ শতাধিক নেতা-কৰ্মী আৰু শ্ৰমিক মহিলাই নিলম্বিত সভাপতি তথা বিতৰ্কিত সচিব জনৰ বিৰুদ্ধে প্ৰতিবাদ সাব্যস্ত কৰাৰ লগতে ভুৱা গোচৰ ৰুজু কৰা আৰু ভুৱা জাতিৰ প্ৰ-পত্ৰ প্ৰদান কৰা বিষয়টোৰ ওপৰত ব্যৱস্থা ল’বলৈ আৰক্ষীক দাবী জনায়।
