ডবকাত ট্ৰাক আৰু স্কুটিৰ মুখামুখি সংঘৰ্ষত থিতাতে নিহত এগৰাকী মহিলা

হোজাই জিলাৰ ডবকা আৰক্ষী থানাৰ অন্তৰ্গত হিন্দুব্লক গাৱত আজি পুৱা এটা শোকাবহ পথ দুৰ্ঘটনা সংগঠিত হয় ৷ দুৰ্ঘটনাৰ ফলত হালিমা বেগম (৩৮) নামৰ এগৰাকী মহিলা থিতাতে নিহত হয় ৷

প্ৰাপ্ত তথ্য অনুসৰি আজি ৰাতিপুৱা ৯ মান বজাত ডবকাৰ নাম ডবকা গাৱৰ পৰা হালিমা বেগম নামৰ মহিলা গৰাকীয়ে ৰাষ্ট্ৰীয় নাগৰিকপঞ্জী সম্বন্ধীয় কিছু প্ৰয়োজনীয় কামৰ বাবে আত্মীয়ৰ লগত  এ এচ ০৬ কে ৯৯৪৬ নম্বৰৰ স্কুটিত উঠি হোজাই অভিমুখে গৈ আছিল ৷ স্কুটিখন হিন্দুব্লক গাওঁ পোৱাৰ সময়তে বিপৰীত দিশৰ পৰা আহি থকা এ এছ ০৯ এ চি  ২৭৩৫ নম্বৰৰ ইটা ভৰ্তি ট্ৰাক এখনে নিয়ন্ত্ৰণ হেৰুৱাই স্কুটি খনত প্ৰচণ্ড জোৰেৰে খুণ্ডা মাৰে ৷

এই সংঘৰ্ষৰ ফলত স্কুটিত পাচফালে বহিথকা হালিমা বেগম নামৰ মহিলা গৰাকী উফৰি গৈ ট্ৰাকৰ চকাৰ তলত সোমায়। ফলত মহিলা গৰাকী থিতাতে নিহত হয় ৷

আনহাতে, দুৰ্ঘটনা সংগঠিত কৰিয়েই ট্ৰাকখনৰ চালক আৰু হেণ্ডিমেনজনে পলায়ন কৰে ৷ পৰবৰ্তী সময়ত ঘটনাস্থলীত ডবকা আৰক্ষী উপস্থিত হৈ ৰাইজৰ সহযোগত মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে নগাওঁ ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে ৷