কৰ’না ৰোগীৰ বাবে আটাইতকৈ ডাঙৰ সমস্যা হৈছে ডায়েবেটিছ আৰু হাইপাৰটেনশ্যন
ডায়েবেটিছ বা হাইপাৰটেনশ্যনে কৰ’না ভাইৰাছৰ দ্বাৰা আক্ৰান্তসকলৰ বাবে অধিক বিপদ কঢ়িয়াই আনিছে।
অৱশ্যে, এই কথা আগৰে পৰা শুনি অহা হৈছে। কিন্তু কেন্দ্ৰীয় স্বাস্থ্য মন্ত্ৰ্যালয়ৰ তথ্য এইবাৰ সেই কথাকে দোহাৰিছে।
তথ্য অনুসৰি, কৰ’না আক্ৰান্তসকলৰ ভিতৰত ৫.৭৪শতাংশ আৰু ৫.২০ শতাংশৰ ক্ষেত্ৰত ক’মৰ্বিডিটি (সহ ৰুগ্নতা) হিচাপে হাইপাৰটেনশ্যন আৰু ডায়েবেটিছত ভোগা পোৱা গৈছে।
কৰ’না আক্ৰান্ত সকলৰ মাজত ৭৬শতাংশই সহ ৰুগ্নতাৰ বলি। ইয়াৰ ভিতৰত হাইপাৰটেনশ্যন আৰু ডায়েবেটিছৰ উপৰিও লিভাৰ, হৃদযন্ত্ৰ, কিডনীৰ অসুখ বা কেন্সাৰৰ দৰে মাৰাত্মক ৰোগো আছে।
শেহতীয়া তথ্য অনুসৰি, মুঠ আক্ৰান্তৰ ৬৩ শতাংশই ৪০বছৰ বাব তাতকৈ কম বয়সৰ। মাত্ৰ ১০ শতাংশৰ বয়স ৬০ৰ অধিক।
এইক্ষেত্ৰত আক্ৰান্ত হিচাপে পুৰুষ আৰু মহিলাৰ হাৰ ক্ৰমে ৬৮.৪৮ আৰু ৩১.৫১ শতাংশ। এই তথ্যৰ পৰা এটা কথা স্পষ্ট হৈ পৰিছে যে সমগ্ৰ বিশ্বৰ লেখিয়াকৈ ভাৰততো তৰুণ প্ৰজন্মই কোভিড-১৯ত অধিক আক্ৰান্ত হৈছে।
জ্বৰ, কাঁহ আৰু ডিঙিৰ বিষ এই তিনিটা ৰোগৰ সাধাৰণ লক্ষণ হিচাপে দেখা গৈছে।
লেব’ৰটেৰীৰ পৰা চিনাক্ত কৰা ৩৭,০৮৪গৰাকী আক্ৰান্তৰ ভিতৰত ২৫.০৩ শতাংশই জ্বৰত আক্ৰান্ত হৈছিল। লগতে কাহ আৰু ডিঙিৰ বিষ আছিল ক্ৰমে ১৬.৩৬ আৰু ৭.৩৫ শতাংশৰ। ইয়াৰ বিপৰীতে ৫.১১শতাংশই শ্বাসকষ্টত ভূগিছিল।