আত্মহত্যা! শ্বুটিং ছেটতে মৃত্যু জনপ্ৰিয় অভিনেত্ৰীৰ; ৱাশ্বৰুমৰ পৰা উদ্ধাৰ মৃতদেহ

সৰু পৰ্দাৰ এগৰাকী জনপ্ৰিয় অভিনেত্ৰী তুনিশা শৰ্মা। শেহতীয়াকৈ তেওঁ ধাৰাবাহিক ‘আলি বাবা: দস্তান এ কাবুল’ত অভিনয় কৰিছিল। শনিবাৰে মুম্বাইত সেই ধাৰাবাহিকৰ ছেটতে তেওঁক মৃত অৱস্থাত পোৱা গৈছে।

দৰাচলতে তুনিশাৰ মৃত্যু কেনেকৈ হৈছিল সেইটো এতিয়াও স্পষ্ট হোৱা নাই। অৱশ্যে, বহুতেই ধাৰণা কৰে যে তেওঁ আত্মহত্যাই কৰিছে। জানিব পৰা মতে, অভিনেত্ৰীগৰাকীৰ সহ অভিনেতা শ্বেজান মহম্মদ খানৰ সৈতে প্ৰেমৰ সম্পৰ্ক আছিল আৰু তেওঁৰ সৈতে হোৱা সংঘাতৰ ফলতেই অভিনেত্ৰীগৰাকীয়ে আত্মহত্যা কৰাৰ অভযোগ উত্থাপিত হৈছে।

কেৱল সৰু পৰ্দাতে নহয়, তুনিশাই বলীউদৰ ডাঙৰ পৰ্দাতো বহু অভিনয় কৰিছে। বিশেষকৈ কেটৰিনা কাইফৰ সৈতে তেওঁৰ সাদৃশ্যৰ বাবে তুনিশাই কেটৰিনা অভিনীত বহু চলচ্চিত্ৰত তেওঁৰ শৈশৱৰ চৰিত্ৰত অভিনয় কৰিছে।

তুনিশাক ‘ফিতুৰ’, ‘বাৰ বাৰ দেখো’ৰ দৰে চলচ্চিত্ৰত এনে চৰিত্ৰত দেখা গৈছিল। ইয়াৰ লগতে ধাৰাবাহিকত অভিনয় অব্যাহত আছিল তুনিশাৰ।

শনিবাৰে তুনিশাৰ মৃত্যুৰ বাতৰি বিয়পি পৰাৰ লগে লগে মুম্বাইৰ ধাৰাবাহিকৰ জগতখন শোকস্তব্ধ হৈ পৰে। তেওঁক ৱাশ্বৰুমৰ ভিতৰত ওলমি থকা অৱস্থাত পোৱা গৈছিল।

অভিনেত্ৰীগৰাকীক ততাতৈয়াকৈ চিকিৎসালয়লৈ লৈ যোৱা হৈছিল আৰু তাত চিকিৎসকে তেওঁক মৃত বুলি ঘোষণা কৰে। আৰক্ষীয়ে ঘটনাৰ তদন্ত আৰম্ভ কৰিছে।