অভিনয়ৰ পৰা অৱসৰ ল’বলৈ ওলাইছে বিক্ৰান্ত মাছে। দেওবাৰে মাজনিশা ছ’চিয়েল মিডিয়াত এই কথা ঘোষণা কৰে অভিনেতাগৰাকীয়ে। মাত্ৰ ৩৭ বছৰ বয়সত কেৰিয়াৰৰ শিখৰত উপনীত হোৱাৰ সময়তে তেওঁৰ এনে সিদ্ধান্তত অনুৰাগীসকল স্তম্ভিত হৈ পৰিছে।
অভিনেতাগৰাকীয়ে ‘টুৱেলভ ফেইল’, ‘দ্য সাবৰমতী ৰিপ’ৰ্ট’কে ধৰি একাধিক চিনেমাৰ বাবে সমালোচকৰ প্ৰশংসা লাভ কৰিছে। হাতত আৰু দুটা ডাঙৰ কাম আছে। সেই কামেৰেই তেওঁ এতিয়াৰ বাবে কেৰিয়াৰৰ সামৰণি মাৰিবলৈ ওলাইছে। ছ’চিয়েল মিডিয়াত তেওঁ লিখিছে যে ২০২৫ চনৰ পিছত আৰু অনুৰাগীৰ সৈতে দেখা নহ’ব।
তেওঁ লিখিছে, ‘যোৱা কেইবছৰমান আসাধাৰণ গৈছে। আমাক সহায় কৰাৰ বাবে সকলোকে ধন্যবাদ। কিন্তু জীৱনত আগবাঢ়ি যোৱাৰ লগে লগে মই বুজিব পাৰিছো যে মই ঘৰলৈ উভতি যাব লাগিব। এজন স্বামী, এজন পিতৃ, এজন পুত্ৰ হিচাপে সেই দায়িত্ব মোৰ কান্ধত। এগৰাকী অভিনেতা হিচাপেও।’
অৱসৰৰ কথা ঘোষণা কৰাৰ কিছু সময়ৰ পিছতে তেওঁ লিখিছে, ‘২০২৫ আহি আছে, ২০২৫ চনতে সকলোৰে সৈতে পৰ্দাত শেষবাৰৰ বাবে দেখা হ’ব।’ পোষ্টটোৰ শেষত অভিনেতাজনে পুনৰ সকলোকে ধন্যবাদ জনায়।
কিন্তু শেষত তেওঁ পনৰ লিখিছে, ‘২০২৫-তে শেষবাৰ দেখা হ’ব, সঠিক সময় নহালৈকে।’ অৰ্থাৎ সঠিক সময় নহালৈকে তেওঁ অৱসৰত থাকিব। হয়তো সময় আহিলে তেওঁ পুনৰ পৰ্দালৈ উভতিব।
