ভাৰতীয় পেচাৰ যশপ্ৰীত বুমৰাহৰ বাবে ২০২৪ চনটো এটা সপোনৰ বছৰ আছিল। দেশতেই হওক বা বিদেশতেই হওক, আন্তঃৰাষ্ট্ৰীয় ক্ৰিকেটৰ পৰা ঘৰুৱা ক্ৰিকেটলৈকে সকলোতে সফলতা আহিছে। বৰ্ডাৰ-গাভাস্কাৰ ট্ৰফীত তেওঁৰ দুৰ্দান্ত প্ৰদৰ্শনৰ পিছত এতিয়া কেৱল ভাৰতীয়ই নহয়, সকলো ক্ৰিকেটপ্ৰেমীয়ে বুমৰাহৰ অনুৰাগী। সেই তালিকাত প্ৰাক্তন ক্ৰিকেটাৰৰ পৰা আৰম্ভ কৰি মন্তব্যকাৰীলৈকে সকলোকে অন্তৰ্ভুক্ত কৰা হৈছে।
এইবাৰ বুমৰাহৰ বিৰাট প্ৰশংসা শুনা গ’ল অষ্ট্ৰেলিয়াৰ প্ৰাক্তন ক্ৰিকেটাৰ এডাম গিলক্ৰিষ্টৰ পৰা। তেওঁৰ মতে বুমৰাহে সৰ্বকালৰ অন্যতম শ্ৰেষ্ঠ বেটছমেন ডন ব্ৰেডমেনকো কঠিন প্ৰত্যাহ্বানৰ মুখত পেলাব পাৰিলেহেঁতেন।
শেহতীয়াকৈ এডাম গিলক্ৰিষ্ট আৰু ইংলেণ্ডৰ প্ৰাক্তন ক্ৰিকেটাৰ মাইকেল ভ’নে এটা প’ডকাষ্টত অংশগ্ৰহণ কৰিছিল। তাত গিলক্ৰিষ্টে কয়, “মই বুমৰাহক কোনো নম্বৰ দিব নিবিচাৰো, কাৰণ তেওঁ বিশ্ব ক্ৰিকেটত নিজকে যি স্তৰলৈ লৈ গৈছে, সেইটো কোনো সংখ্যাৰে বিচাৰ কৰিব নোৱাৰি। মই ভাবো ব্ৰেডমেনৰ বিৰুদ্ধে খেলিলেও বুমৰাহে তেওঁক অতি কম সময়ৰ ভিতৰতে আউট কৰিব পাৰিলেহেঁতেন। আনকি বুমৰাহৰ দৰে বলাৰৰ বিৰুদ্ধে খেলিলে ব্ৰেডমেনৰ ঐতিহাসিক বেটিং গড় ৯৯ ৰান হয়তো যথেষ্ট হ্ৰাস পালেহেঁতেন। মই ভাবো বুমৰাহৰ বিৰুদ্ধে ব্ৰেডমেনৰ বেটিং গড় প্ৰায় ৩৫ৰ আশেপাশে থাকিলেহেঁতেন। কোনো প্ৰশংসাই বুমৰাহৰ বাবে যথেষ্ট নহয়।”
মাইকেল ভ’নেও বুমৰাহৰ প্ৰদৰ্শনক ১০ৰ ভিতৰত ১০ নম্বৰ দিয়ে। ২০২৪ চনত অষ্ট্ৰেলিয়া আৰু ইংলেণ্ড দুয়োটা শৃংখলাত বুমৰাহে দুৰ্দান্ত প্ৰদৰ্শন আগবঢ়াইছিল। বৰ্ডাৰ-গাভাস্কাৰ ট্ৰফীত গড়ে মাত্ৰ ১৩.০৬ ৰান দি ৫খন টেষ্টত ৩২টা উইকেট দখল কৰিছে বুমৰাহে। ইংলেণ্ডৰ বিৰুদ্ধেও তেওঁ ১৯টা উইকেট দখল কৰে।
টি-২০ বিশ্বকাপতো ১৫ উইকেট দখল কৰি বুমৰাহে শ্ৰেষ্ঠ বলাৰ হিচাপে পৰিগণিত হয়। আন্তঃৰাষ্ট্ৰীয় ক্ৰিকেটত ২১খন খেলত মুঠ ৮৬টা উইকেট দখল কৰি ২০২৪ চনত তেওঁ সৰ্বাধিক উইকেট দখল কৰিছে।
