আদানিয়ে কিনা নাই দ্য আসাম ট্ৰিবিউন : বিক্ৰীৰ খবৰ সম্পূৰ্ণ মিছা আৰু ভুৱা বুলি স্পষ্ট কৰিলে কৰ্তৃপক্ষই
গুৱাহাটীৰ পৰা প্ৰকাশিত অতি জনপ্ৰিয় ইংৰাজী দৈনিক কাকত দ্য আসাম ট্ৰিবিউন উদ্যোগপতি গৌতম আদানিৰ হাতলৈ যোৱা বুলি ছচিয়েল মিডিয়াত চলি থকা চৰ্চা সম্পূৰ্ণৰূপে খণ্ডন কৰিছে কাকত কৰ্তৃপক্ষই। এই খবৰটোক সম্পূৰ্ণ ভিত্তিশূন্য, মিছা আৰু মানহানিকাৰক বুলি অভিহিত কৰিছে আসাম ট্ৰিবিউন গোষ্ঠীয়ে।
ছচিয়েল মিডিয়াত এই সন্দৰ্ভত এক আনুষ্ঠানিক বিবৃতি জাৰি কৰি পৰিচালনা সমিতিয়ে স্পষ্ট কৰি দিয়ে যে এনে কোনো ধৰণৰ বিক্ৰী প্ৰক্ৰিয়া হোৱা নাই।
আসাম ট্ৰিবিউন পৰিচালনা সমিতিয়ে জনোৱা মতে, যোৱা ২৪ মে’ত জ্ঞানেন চক্ৰৱৰ্তী নামৰ এজন ব্যক্তিয়ে কৰা এটা অপৰীক্ষিত ফেচবুক পোষ্টৰ পৰাই এই উৰাবাতৰিৰ সৃষ্টি হৈছিল। সেই পোষ্টটোত দাবী কৰা হৈছিল যে কাকতখনি ৪২০ কোটি টকাত আদানিক বিক্ৰী কৰা হৈছে। কোনো ধৰণৰ সত্যতা নিৰূপণ নকৰাকৈ আৰু কোনো চৰকাৰী বা বিশ্বাসযোগ্য উৎসৰ অবিহনেই একাংশ জনা-বুজা ব্যক্তি আৰু আনকি সংবাদ মাধ্যমেও এই ভুৱা খবৰটো ছচিয়েল মিডিয়াত বিয়পাই দিয়াত কৰ্তৃপক্ষই তীব্ৰ ক্ষোভ প্ৰকাশ কৰে।
এই স্পষ্টীকৰণৰ পিছতে ছচিয়েল মিডিয়াত অজস্ৰ পাঠকে কাকতখনৰ প্ৰতি সমৰ্থন আৰু শুভেচ্ছা আগবঢ়ায়। বহুতৰে মতে আসাম ট্ৰিবিউন হৈছে আমাৰ অঞ্চলটোৰ আটাইতকৈ বিশ্বাসী আৰু নীতিগত সংবাদ প্ৰতিষ্ঠান। কাকতখনি বিক্ৰী হোৱাৰ খবৰটো মিছা বুলি জানিব পাৰি অসমৰ সচেতন পাঠকে স্বস্তিৰ নিশ্বাস পেলাইছে আৰু আসাম ট্ৰিবিউন পৰিয়ালৰ প্ৰতি গভীৰ সন্মান তথা আস্থা প্ৰকাশ কৰিছে।
কাকতখনে নিজৰ ৮৮ বছৰীয়া গৌৰৱোজ্জ্বল ইতিহাসৰ কথা সোঁৱৰাই দি কয় যে ইয়াৰ প্ৰতিষ্ঠাপক ৰাধাগোবিন্দ বৰুৱাৰ পৰা আৰম্ভ কৰি বৰুৱা পৰিয়ালৰ কেইবাটাও প্ৰজন্মই এই সংবাদ প্ৰতিষ্ঠানটোৰ বিশ্বাসযোগ্যতা আৰু ৰাইজৰ আস্থা ৰক্ষা কৰিবলৈ অহোপুৰুষাৰ্থ কৰি আহিছে।
বিগত প্ৰায় নটা দশক ধৰি আসাম ট্ৰিবিউনে পাঠকৰ যি বিশ্বাস অৰ্জন কৰিছে, তাক অনাগত দিনতো ধৰি ৰাখিব বুলি তেওঁলোকে স্পষ্ট কৰি দিয়ে। ইয়াৰ লগতে এনে উৰাবাতৰি আৰু মিছা খবৰ সৃষ্টি কৰা বা বিয়পোৱা ব্যক্তি আৰু সংগঠনৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব বুলিও পৰিচালনা সমিতিয়ে সকীয়াই দিছে।