সমগ্ৰ দেশৰ লগতে বিশ্বনাথতো আজিৰ পৰা ৩২ তম ৰাষ্ট্ৰীয় পথ সুৰক্ষা সপ্তাহ পালন কৰা হৈছে।
বিশ্বনাথ জিলা পৰিবহন বিষয়াৰ কাৰ্যালয় আৰু বিশ্বনাথ জিলা প্ৰশাসনৰ উদ্যোগত অনুষ্ঠিত এই পথ সুৰক্ষা সপ্তাহৰ আজিৰ প্ৰথম কাৰ্যসূচীত বিশ্বনাথ চাৰিআলিত উলিওৱা হয় এক বাইক ৰেলী।
২০ জানুৱাৰিৰ পৰা ২৫ জানুৱাৰিলৈকে জিলাখনৰ বিভিন্ন স্থানত চলিব লগা এই পথ সুৰক্ষা সপ্তাহৰ প্ৰথম কাৰ্যসূচীৰ ফ্লেগ অফ কৰি শুভাৰম্ভ কৰে বিশ্বনাথৰ অতিৰিক্ত উপায়ুক্ত সূৰ্য কমল বৰা আৰু অতিৰিক্ত আৰক্ষী অধীক্ষক সৌৰভ শইকীয়াই।
জিলাখনৰ গহপুৰ, বৰগাং, বিশ্বনাথ আৰু চতিয়াত পথ সুৰক্ষা সপ্তাহ উপলক্ষ্যে বিভিন্ন সজাগতা সভাৰ লগতে উক্ত স্থান সমূহত বাটৰ নাট প্ৰদৰ্শিত হ’ব বুলি জিলা পৰিবহন বিষয়া উমেশ শৰ্মাই জানিবলৈ দিছে।
উল্লেখ্য যে মটৰচাইকেল চালক আৰু আৰোহীয়ে হেলমেট পৰিধান কৰা, নিচাযুক্ত দ্ৰব্য পৰিহাৰ কৰা আৰু যান-বাহন আইন মানি চলাৰ বাবে যুৱ প্ৰজন্মক সজাগ কৰাৰ উদ্দেশ্যে প্ৰতিবছৰে ৰাষ্ট্ৰীয় পথ সুৰক্ষা সপ্তাহৰ কাৰ্যসূচী ৰূপায়ন কৰি আহিছে।
