কালি কামৰূপ মহানগৰ জিলাত ১৫ জনকৈ লোকৰ দেহত মাৰাত্মক কোভিড-১৯ ভাইৰাছ ধৰা পৰাৰ পাছত অধিক তৎপৰ তথা কঠোৰ হৈছে অসম আৰক্ষী।
কণ্টেইনমেণ্ট জ’নৰ পৰা বাহিৰলৈ ভ্ৰমণ নকৰিবলৈ জনসাধাৰণক অনুৰোধ জনাইছে এডিজিপি(আইন) জি পি সিঙে।
টুইটাৰযোগে এই অনুৰোধ জনাইছে সিঙে।
নিশা প্ৰায় ১ বজাত কৰা এটা টুইটত তেওঁ লিখি কয় যে, “অতি বিনম্ৰ অনুৰোধ যে কণ্টেইনমেণ্ট জ’নৰ পৰা অন্য জিলালৈ জনসাধাৰণে আন্তঃজিলা ভ্ৰমণ কৰিবলৈ অনুমতি পত্ৰ নিবিচাৰিব।”
“কণ্টেইনমেণ্ট জ’নৰ পৰা ভ্ৰমণ কৰি অসমৰ ৩.৩ কোটি জনতালৈ বিপদ কঢ়িয়াই নানিব।” তেওঁ লগতে কয়।
ইপিনে, সমগ্ৰ ৰাজ্যৰে কণ্টেইনমেণ্ট জ’নৰ পৰা লোকসকলক বাহিৰলৈ ওলাই আহিবলৈ অনুমতি দিয়া নহ’ব বুলি তেওঁ টুইটত উল্লেখ কৰে।
উল্লেখযোগ্য যে, কালি গুৱাহাটীত ১৫ গৰাকী লোকৰ দেহত এই মাৰাত্মক ভাইৰাছ ধৰা পৰাৰ পাছত মহানগৰীৰ ফাঁচিবজাৰ, ফটাশিল আমবাৰী, পাণবজাৰ ৰেইলৱে কলনি, শান্তিপুৰ আশ্ৰম ৰোড আৰু কুমাৰপাৰাক কণ্টেইনমেণ্ট জ’ন হিচাপে ঘোষণা কৰা হৈছে।
ইয়াৰ পূৰ্বে মহানগৰৰ লগতে ৰাজ্যৰ বিভিন্ন প্ৰান্তত কেইবাটাও কণ্টেইনমেণ্ট জ’ন ঘোষণা কৰিছিল প্ৰশাসনে।
