বিশিষ্ট চলচ্চিত্ৰ পৰিচালক ৰিচি মেহতাৰ নতুন ছবিত বংগবন্ধু শ্বেখ মুজিবুৰ ৰহমানৰ চৰিত্ৰত অভিনয় কৰিব অভিনেতা আদিল হুছেইনে। বাংলাদেশৰ স্বাধীনতা সংগ্ৰামৰ পটভূমিত নিৰ্মাণ কৰা হ’ব এই ছবিখন।
‘দিল্লী ক্ৰাইম’ ছবিখনেৰে স্বীকৃতি লাভ কৰাৰ পাছত ৰিচি মেহতাই নিৰ্মাণ কৰিবলগীয়া এই ছবিখনৰ নাম হৈছে ‘বেটেল ফৰ বেংগল’।
চলিত বছৰতেই বাংলাদেশৰ স্বাধীনতাৰ সোণালী জয়ন্তী উপলক্ষে ছবিখন মুক্তি দিয়াৰ কথা আছিল। কিন্তু যোৱা মাৰ্চ মাহত দেশজুৰি আৰম্ভ হোৱা লকডাউনৰ বাবে ছবিৰ কাম থমকি ৰয়।
জানিব পৰা মতে, বাংলাদেশত ছবিখনৰ পৰ্বেক্ষণৰ বাবে যোৱা দলটোত আছিল একশ্যন ডিৰেক্টৰ শ্যাম কৌশল, চিত্ৰ গ্ৰহণকাৰী আমিৰ মোকৰি।
ছবিখনৰ প্ৰযোজনা কৰিছে লছ এঞ্জেলছৰ এটা প্ৰযোজনা সংস্থাই। সকলো ঠিকে ঠাকে থাকিলে অহা বছৰৰ মাৰ্চ-এপ্ৰিল মাহত ছবিখনৰ শ্বুটিং আৰম্ভ কৰাৰ কথা।
উল্লেখ্য যে বাংলাদেশৰ স্বাধীনতা সংগ্ৰামত বংগবন্ধু শ্বেখ মুজিবুৰ ৰহমানৰ ভূমিকা আছিল অতুলনীয়। চলিত বছৰতে তেওঁৰ জন্ম শতবাৰ্ষিকী চলিছে।
অপ্ৰশিক্ষিত জনসাধাৰণক লৈ বংগবন্ধু মুজিবুৰ ৰহমানে বাংলাদেশৰ মুক্তিযুদ্ধৰ বাবে সংগ্ৰামত অৱতীৰ্ণ হৈছিল। এইক্ষেত্ৰত ভাৰতে বিশেষভাৱে সহায় কৰিছিল।
কানাডিয়ান পৰিচালক ৰিচি মেহতাই ২০০৭ চনত ‘অমল’ ছবিৰ জৰিয়তে ভূমুকি মাৰিছিল। সেই ছবিত অভিনয় কৰিছিল নাছিৰুদ্দিন শ্বাহে। ছবিখনে আন্তৰ্জাতিক স্বীকৃতিও লাভ কৰিছিল।
