পুনৰ বিস্ফোৰণত কঁপি উঠিল তালিবান শাসিত আফগানিস্তান। এই আত্মঘাতী বিস্ফোৰণত উত্তৰ বালখ প্ৰদেশৰ তালিবানৰ গৱৰ্ণৰ মহম্মদ ডাউদ মুজাম্মিলৰ মৃত্যু হয়। প্ৰাদেশিক ৰাজধানী মাজাৰ-ই শ্বৰীফৰ কাৰ্যালয়ত মুজাম্মিলক হত্যা কৰা হয়।
এই আত্মঘাতী আক্ৰমণত ইছলামিক ষ্টেট (আই এছ) জড়িত আছে বুলি জানিব পৰা গৈছে। উল্লেখ্য যে, ২০২১ চনত তালিবানে আফগানিস্তানৰ ক্ষমতা অধিগ্ৰহণ কৰাৰ পিছত ডাউদ মুজাম্মিলেই হৈছে এইদৰে নিহত হোৱা তালিবানৰ আটাইতকৈ জ্যেষ্ঠ বিষয়া।
তালিবানৰ মুখপাত্ৰ জাবিহুল্লাহ মুজাহিদে এক টুইট যোগে গৱৰ্ণৰগৰাকী ইছলামৰ শত্ৰুৰ বিস্ফোৰণত শ্বহীদ হৈছে বুলি উল্লেখ কৰে। মুজাম্মিলে পূব প্ৰদেশ নংগাৰহৰৰ গৱৰ্ণৰ হিচাপে পূৰ্বৰ কাৰ্যকালত আই এছৰ বিৰুদ্ধে অভিযানৰ নেতৃত্ব দিছিল। যোৱা অক্টোবৰ মাহত তেওঁক বালখলৈ স্থানান্তৰ কৰা হৈছিল।
বালখ আৰক্ষীৰ মুখপাত্ৰ মহম্মদ আছিফ ৱাজিৰীয়ে বৃহস্পতিবাৰে পুৱা গৱৰ্ণৰ কাৰ্যালয়ৰ দ্বিতীয় মহলাত এই বিস্ফোৰণ সংঘটিত হয় বুলি সদৰী কৰিছে। ইফালে বিস্ফোৰণৰ পিছতে আই এছে এক বিবৃতি যোগে এই বিস্ফোৰণৰ দায়িত্ব স্বীকাৰ কৰে।
বিবৃতিটোত আই এছে তেওঁলোকৰ এগৰাকী জোৱানে অট্টালিকাটোত প্ৰৱেশ কৰি আত্মঘাতী বিস্ফোৰণ কৰিবলৈ সক্ষম হৈছে বুলি উল্লেখ কৰে আৰু বিস্ফোৰণত একাংশ নিৰাপত্তাৰক্ষীও নিহত হৈছে বুলি দাবী কৰে।
উল্লেখ্য যে, তালিবানে দেশখনৰ ক্ষমতা নিজৰ হাতলৈ অনাৰ পিছত দেশখনত ধাৰাবাহিকভাৱে আক্ৰমণ চলাই আহিছে ইছলামিক ষ্টেটে। তালিবানৰ প্ৰতিদ্বন্দী গোটটোৱে তালিবান শাসনৰ বিৰোধিতাৰে তালিবানৰ সমৰ্থকসকলক আক্ৰমণৰ লক্ষ্য কৰি লৈছে।
