পুনৰ এক বিস্ফোৰণে কঁপাই তুলিছে আফগানিস্তান। আজি দেশখনৰ ৰাজধানী চহৰ কাবুলত এক ক্ৰিকেট মেচ চলি থকাৰ সময়তে ষ্টেডিয়ামৰ ভিতৰত বিস্ফোৰণ সংঘটিত কৰে আত্মঘাতী বোমাৰুৱে।
কাবুল আন্তঃৰাষ্ট্ৰীয় ক্ৰিকেট ষ্টেডিয়ামত চলি থকা আফগানিস্তানৰ ঘৰুৱা টি-২০ ক্ৰিকেট প্ৰতিযোগিতা শ্বাপেজেজা টি-২০ ক্ৰিকেট লীগৰ বেণ্ড-ই-আমিৰ ড্ৰেগন আৰু পামিৰ জালমীৰ মাজত চলি থকা খেলৰ সময়তে এই বিস্ফোৰণ সংঘটিত হয়।
গেলেৰীত বিস্ফোৰণ সংঘটিত হোৱাৰ লগে লগে তৎকালীনভাৱে সকলো খেলুৱৈকে নিৰাপদভাৱে এটা বাংকাৰৰ ভিতৰলৈ লৈ যোৱা হয়। আফগানিস্তান ক্ৰিকেট ব’ৰ্ডৰ কাৰ্যবাহী বিষয়া নাছিব খান এই বিস্ফোৰণত চাৰিজন লোক আহত হৈছে বুলি জানিবলৈ দিছে।
ঘটনাটোত কোনো লোকৰে এইপৰ্যন্ত মৃত্যু হোৱা নাই বুলি জাদৰানে লগতে কয়। উল্লেখ্য যে ৰাষ্ট্ৰসংঘৰ কেইগৰাকীমান বিষয়াও বিস্ফোৰণৰ সময়ত ষ্টেডিয়ামত উপস্থিত আছিল।
উল্লেখ্য যে তালিবানে দেশখনৰ ক্ষমতা নিজৰ হাতলৈ অনাৰ পিছত দেশখনত কেইবাটাও বিস্ফোৰণ সংঘটিত হৈছে। তালিবান শাসনৰ বিৰুদ্ধে স্থিতি গ্ৰহণ কৰি কেইবাটাও কট্টৰ ইছলামিক সন্ত্ৰাসবাদী গোটে দেশখনত আক্ৰমণ সংঘটিত কৰি আহিছে।
