কেচ ড্ৰপ কৰাৰ লজ্জাজনক প্ৰদৰ্শনৰ পিছত যশপ্ৰীত বুমৰাহৰ মেজিক আৰু ডাৱৰীয়া আকাশত কে এল ৰাহুলৰ মসৃন বেটিং – মুঠতে হেডিংলে টেষ্টৰ তৃতীয় দিনৰ শেষত ভাৰতে জয়ৰ পথ মুকলি ৰাখিছে।
তৃতীয় দিনৰ শেষত ভাৰতৰ স্ক’ৰ দুটা উইকেটৰ বিনিময়ত ৯০ ৰান। ক্ৰীজত আছে কে এল ৰাহুল (৪৭ ৰান) আৰু শুভমন গীল (৬ ৰান)। প্ৰথম টেষ্টৰ ভাগ্য বহুলাংশে নিৰ্ভৰ কৰিছে চতুৰ্থ দিনটোত তেওঁলোকৰ পাৰ্টনাৰশ্বিপ কিমান দূৰলৈ চলে তাৰ ওপৰত।
দ্বিতীয় ইনিংছত ভাৰতৰ লীড বৰ্তমান ৯৬ ৰান। কাৰণ ভাৰতে প্ৰথম ইনিংছত মাত্ৰ ৬ ৰানৰ লীডহে লাভ কৰিছিল। ইয়াৰ আঁৰত ভাৰতীয় দলৰ দুৰ্বল বলিং (বুমৰা আৰু অলপ ৰবীন্দ্ৰ জাদেজাৰ বাহিৰে) আৰু আটাইতকৈ বেয়া ফিল্ডিং। মুঠতে হেৰী ব্ৰুকে একাধিক জীৱন লাভ কৰাৰ পিছত ৯৯ ৰান সংগ্ৰহ কৰে। ইংলেণ্ডে শেষৰ পাঁচটা উইকেটত ১৮৯ ৰান সংযোজন কৰে।
প্ৰথম ইনিংছত ভাৰতে ৪৭১ ৰান সংগ্ৰহ কৰাৰ বিপৰীতে ইংলেণ্ড ৪৬৫ ৰানত আটাইকেইটা উইকেট হেৰুৱায়। ইংলেণ্ডৰ আঠ নম্বৰ, ন নম্বৰ আৰু দহ নম্বৰ বেটছমেনে ক্ৰমে ৩৮ ৰান, ২২ ৰান আৰু ১১ ৰান সংগ্ৰহ কৰে।
শেষত বুমৰাহে অন্তিম দুটা উইকেটো দখল কৰে। তেওঁ ২৪.৪ অভাৰত ৮৪ ৰানত ৫টা উইকেট দখল কৰে। শ্বৰ্ট বলটো ভালদৰে ব্য়ৱহাৰ কৰি প্ৰসিদ্ধ কৃষ্ণই তিনিটা উইকেট দখল কৰে। মহম্মদ ছিৰাজে দুটা উইকেট পায়।
ভাৰতে ৬ ৰানৰ অগ্ৰগতিৰে দ্বিতীয় ইনিংছ আৰম্ভ কৰে। কিন্তু প্ৰথম ইনিংছত শতক অৰ্জন কৰা যশস্বী জয়ছৱাল ব্ৰাইডন কাৰ্ছৰ এটা দুৰ্দান্ত বলত চাৰি ৰাণতে আউট হয়। তাৰ পাছত ৰাহুল আৰু সাই সুদৰ্শনে দ্বিতীয় উইকেটত ৬৬ ৰান সংযোজন কৰে।
প্ৰথম ইনিংছৰ ব্যৰ্থতা অতিক্ৰম কৰি ভাৰতীয় সুদৰ্শনে দ্বিতীয় ইনিংছত ভাল খেল অব্যাহত ৰাখিছিল। কিন্তু বেন ষ্ট’কছৰ এটা দুৰ্বল বলত তেওঁ ৩০ ৰানত আউট হৈ যায়। ইয়াৰ পিছত ৰাহুল আৰু গীলে ভাৰতক আৰু কোনো বিপদৰ সন্মুখীন হ’বলৈ নিদিলে।
তৃতীয় দিনটোত ভাৰতে আৰু ভাল স্থানলৈ উঠিব নোৱাৰাৰ কাৰণ হ’ল নিকৃষ্টতম ফিল্ডিং। ভাৰতীয় ফিল্ডাৰসকলে ইটোৰ পিছত সিটো কেচ ড্ৰপ কৰে। বিশেষকৈ যশস্বীয়ে দৃষ্টিকটুভাৱে কেচ পেলাইছিল। বুমৰাহৰ বলৰ পৰা কমেও চাৰিটা কেচ হৈছিল। মুঠতে ভাৰতীয় দলটোৱে যোৱা পাঁচ বছৰত টেষ্ট ইনিংছত ইমান কেচ ড্ৰপ কৰা নাই, সেয়া হেডিংলেত ঘটিল।
