আৰক্ষীৰ উপ পৰিদৰ্শকৰ প্ৰশ্ন কাকত ফাদিলৰ লগতে নিযুক্তি প্ৰক্ৰিয়াত বৃহৎ কেলেংকাৰী সংঘটিত হোৱাৰ বাবেই বাতিল কৰা হৈছে আৰক্ষীৰ UB আৰু AB কনিষ্টবলৰ শাৰীৰিক আৰু মৌখিক পৰীক্ষা।
এছ আইৰ কেলেংকাৰীৰ তদন্তৰ বাবে স্থগিত ৰখা হৈছে এই পৰীক্ষা।
আজি বিয়লি ভাগলৈ পৰীক্ষাৰ নতুন তাৰিখ ঘোষণা কৰাৰ সম্ভাৱনা আছে।
ইতিমধ্যে, বহুকেইখন জিলাত মৌখিক আৰু শাৰীৰিক পৰীক্ষা অনুষ্ঠিত হৈছিল তাৰ পাছতো শাৰীৰিক আৰু মৌখিক পৰীক্ষা বাতিল কৰাত এতিয়া বহু উত্তীৰ্ণ হোৱা যুৱক-যুৱতী হতাশাৰ সন্মুখীন হৈছে।
শইকীয়া বাবু মই যোৰহটীয়া নামৰ এজন ফেইচবুক ব্যৱহাৰকাৰীয়ে লিখি ক্ষোভ প্ৰকাশ কৰি কয় “চাকৰি আশা বাদ দিলোঁ আৰু ৰান্দা টানি থকাই ভাল। নিজাববীয়াকৈ কিবা এটা কৰিছোঁ বুলি কবলৈকে হ’ব….বহু কষ্ট কৰিছিলো অথলে গল বুলি বেয়া লগা নাই অলপ মাংস বোৰ কমি যোৱা বাবেহে বেয়া লাগিছে……কম্পিউটাৰত বহি থকা কেইটাই মিটিৰৰ মানুহক নম্বৰ বেছিকৈ দিলে যেন পাইছোঁ…..”
উল্লেখযোগ্য যে, SI ৰ লিখিত পৰীক্ষাত সংঘটিত বৃহৎ কেলেংকাৰীৰ পাছতে সকলো বিভাগৰে নিযুক্তি পৰীক্ষা অনুষ্ঠিত কৰাৰ ক্ষেত্ৰত কেতবোৰ পৰিৱৰ্তন অনা হৈছিল।
বৃহস্পতিবাৰে কেবিনেট বৈঠকত হোৱা সিদ্ধান্ত অনুসৰি কোনোধৰণৰ ব্যক্তিগত প্ৰতিষ্ঠানক পৰীক্ষা অনুষ্ঠিত কৰিবলৈ দিয়া নহ’ব। কোনো বিশ্ববিদ্যালয় নাইবা বিভাগে নিজেই পৰীক্ষা অনুষ্ঠিত কৰিব পাৰিব।
