বিজেপিৰে মিত্ৰতাৰ পৰিণামস্বৰূপে আজি অসমৰ আঞ্চলিক দল অগপই আগন্তুক লোকসভা নিৰ্বাচনত নিজৰ বাবে তিনিখন আসন লাভ কৰিছে। নামনি অসমৰ বৰপেটা, ধুবুৰী আৰু উজনি অসমৰ কলিয়াবৰ সমষ্টিকেইটা দলটোৰ বাবে এৰি দিছে মিত্ৰ বিজেপিয়ে। আজি দিল্লীত বিজেপি-অগপৰ নেতৃত্বৰ বৈঠকত এই আসন বুজাবুজি চূড়ান্ত হয়।
মন কৰিব লগীয়া যে দলটোৰ ভাগ্যত এইকেইখনে আসন পৰাটো পূৰ্বেই নিশ্চিত হৈ আছিল বুলি ক’ব পাৰি। ৰাজ্যিক বিজেপিয়ে যোৱা ১৫ মাৰ্চত ৰাষ্ট্ৰীয় নেতৃত্বলৈ প্ৰেৰণ কৰা দলৰ সম্ভাব্য প্ৰাৰ্থী তালিকাৰ পৰা বাহিৰত ৰখা হৈছিল এই তিনিটা সমষ্টি। বি পি এফক এৰি দিয়া কোকৰাঝাৰকো বাদ দি আন দহটা সমষ্টিৰহে প্ৰাৰ্থীৰ পেনেল প্ৰস্তুত কৰি পঠাইছিল অসম বিজেপিয়ে। অৰ্থাৎ এক প্ৰকাৰৰ পূৰ্বেই বুজাবুজিৰে সন্মত হৈয়ে আছিল অগপ নেতৃত্ব। আজিৰ বৈঠক এক আনুষ্ঠানিকতাহে আছিল।
আনহাতে অসমৰ জাতীয় ভাবাপন্ন ৰাইজ আৰু দলটোৰ তৃণমূল কৰ্মীয়েও এয়ে হ’ব বুলি আশংকা কৰি আছিল। এই শংকাৰ মুকলি প্ৰকাশ কৰা দেখা গৈছিল আঞ্চলিক দলটোৰ তৃণমূল পৰ্য্যায়ৰ কৰ্মীক।
উল্লেখযোগ্য যে অগপক দিয়া সমষ্টিকেইটাৰ এটাতো বিজেপিৰ ভেটি সবল নহয়। নহয় অগপৰো। কলিয়াবৰ সমষ্টিটো বৰ্তমান কংগ্ৰেছৰ দখলত থকাৰ বিপৰীতে ধুবুৰী আৰু বৰপেটা আছে এ আই য়ু ডি এফৰ দখলত। কংগ্ৰেছ আৰু এ আই য়ু ডি এফৰ স্থিতি এতিয়াও সবল আটাইকেইটা সমষ্টিত।
জানিব পৰামতে, অগপক বিজেপিয়ে এই মিত্ৰতাৰ পুৰস্কাৰ স্বৰূপে ৰাজ্য সভাৰ এখন আসনত আঞ্চলিক দলটোৰ এজনক জয়ী কৰাই পঠাব।
