অগপই পুনৰবাৰ অসমক বিশ্বাসঘাটকতা কৰিলে; বোকাখাতত বিজেপি নেতাৰ মন্তব্য
খাৰুৱা তেল, চাহ পাত, ব্ৰহ্মপুত্ৰ আৰু এশিঙীয়া গড়ঁ অসমৰ স্বভিমান। অসমৰ গৌৰৱ। বিশ্ব ঐতিহ্য ক্ষেত্ৰ কাজিৰঙাৰ গঁড়কলৈ কোনোদিনেই অসমীয়াই আপোচ নকৰে। গঁড় হত্যাৰ অভিযোগ থকা লোকক প্ৰাৰ্থীত্ব প্ৰদান কৰি অসম গন পৰিষদ দলে পুনৰবাৰ অসমক বিশ্বাসঘাটকতা কৰিলে। এই মন্তব্য কৰে ভাৰতীয় জনতা পাৰ্টীৰ যুৱ মৰ্চাৰ কাৰ্যনিৰ্বাহক সদস্য আকাশ ফুকনে।
উল্লেখযোগ্য যে আগন্তুক পঞ্চায়ত নিৰ্বাচনত বোকাখাতৰ মৰিধনশিৰি গাঁও পঞ্চায়তৰ সভাপতি পদত অগপই এজন গঁড় চিকাৰীক প্ৰাৰ্থীত্ব প্ৰদান কৰাক লৈ ৰাজ্যজুৰি চলা বিতৰ্কৰ মাজতে ইয়াক অন্যতম নিৰ্বাচনী ইচ্যু হিচাপে লৈ আজি বোকাখাতত অগপৰ বিৰুদ্ধে বিজেপিয়ে জোৰদাৰ প্ৰচাৰ চলায়।
আনহাতে অগপই কেৱল মৰিধনশিৰি গাওঁ পঞ্চায়ততে নহয় কাজিৰঙাৰ কাষৰীয় কেইবাখনো পঞ্চায়তত গঁড় চিকাৰীক প্ৰাধান্য দিছে বুলি বিজেপিৰ যুৱ নেতা আকাশ ফুকনে নৰ্থ-ইষ্ট নাওঁৰ আগত মন্তব্য কৰে।
ইয়াৰ উপৰি তেওঁ দলটোৰ এনে কাৰ্য্য কেৱল নিৰ্বাচনৰ বাবেই নহয় বৰঞ্চ সমগ্ৰ ৰাজ্য আৰু জাতিটোৰ বাবে দূৰ্ভাগ্যজনক বুলি কয়।
উল্লেখযোগ্য যে অগপৰ সভাপতি অতুল বৰাৰ এসময়ৰ ঘনিষ্ঠ বুলি বিবেচিত আকাশ ফুকন আৰু অতুল বৰাৰ মাজত এতিয়া নিৰ্বাচন কেন্দ্ৰীক বিৰোধিতা আকৰ্ষণীয় হৈ উঠিছে ৷ পঞ্চায়ত নিৰ্বাচনক লৈ বোকাখাতত এতিয়া দুয়োটা দলেই পৰস্পৰক বোকা চটিউৱাত ব্যস্ত।
আনহাতে অহা ২৭ নবেম্বৰত মন্ত্ৰী ড০ হিমন্ত বিশ্ব শৰ্মাই বোকাখাতত বিজেপি প্ৰাৰ্থীৰ হৈ নিৰ্বাচনী প্ৰচাৰ চলাবহি।