মিত্ৰতা নেৰে; অমিত শ্বাহৰ পৰা হিমন্ত বিশ্বৰ মন্তব্যৰ উত্তৰ বিচাৰিব অগপই

২৫ নৱেম্বৰত বিজেপি নেতা তথা মন্ত্ৰী ড০ হিমন্ত বিশ্বই মিত্ৰ দল অগপক বিদ্ৰূপ-কটাক্ষৰে এক প্ৰকাৰৰ তুচ্ছ-তাচ্ছিল্য কৰাৰ পিছতো দলটোৰ নেতৃত্বই ইয়াৰ বিৰুদ্ধে আত্মসন্মানজনক প্ৰত্যুত্তৰ দিবলৈ সক্ষম নহ’ল। ইয়াৰ পৰিৱৰ্তে লজ্জাজনকভাৱে দলটোৰ সভাপতিয়ে হিমন্তৰ মন্তব্যৰ উত্তৰ বিচাৰি ৰাষ্ট্ৰীয় সভাপতি অমিত শ্বাহলৈ পত্ৰ লিখিব বুলিহে আজি এখন সংবাদমেলত জানিবলৈ দিয়ে।

উল্লেখযোগ্য যে ২৫ নৱেম্বৰত বিজেপি নেতা তথা বিত্ত মন্ত্ৰী হিমন্ত বিশ্ব শৰ্মাই দলটোক সমালোচনাৰে থকা-সৰকা কৰিছিল। বিশেষকৈ মিত্ৰতাৰ ক্ষেত্ৰত অগপই নিজা সিদ্ধান্ত ল’বলৈ ৰাস্তা খোলা আছে বুলি কি অগপক এক প্ৰকাৰৰ মিত্ৰতা ছেদ কৰিবলৈ প্ৰত্যাহ্বান জনাইছিল হিমন্তই। ইয়াৰ পিছতে আজি অগপ দলটোৰ কৰ্ণধাৰ কমিটীৰ সদস্যসকল বৈঠকত মিলিত হৈছিল।

দুঘণ্টাজোৰা কৰ্ণধাৰ বৈঠকৰ পিছত দলটোৰ নেতৃবৰ্গই সংবাদমেল সম্বোধন কৰে আৰু পুনৰ আগৰ দৰেই সেমসেমীয়া স্থিতি প্ৰকাশ কৰে। ‘ৰাজনীতিত মিত্ৰতা ভংগ কৰাটো এক মুহূৰ্তৰ কথা’ বুলি কৈয়ো দলটোৱে মিত্ৰতা ভংগ নকৰে বুলিহে স্পষ্ট কৰে দলটোৰ কৰ্ণধাৰ সমিতিৰ সদস্যসকলে। ইপিনে সভাপতি অতুল বৰাই হিমন্ত বিশ্ব শৰ্মাৰ তীৰ্যক মন্তব্যৰ উত্তৰ বিচাৰি অমিত শ্বাহলৈ পত্ৰ লিখিব বুলিহে জনায়।

আনহাতে, নাগৰিকত্ব সংশোধনী বিধেয়ক সন্দৰ্ভত পুনৰ আগৰ কথাকে দোহাৰে, “নাগৰিকত্ব সংশোধনী বিধেয়কক লৈ আপোচ নকৰো, দিল্লীৰ কথাত আমি কেতিয়াও উঠা-বহা নকৰো।”

“মোদীয়ে নিৰ্বাচনৰ সময়ত অসমত আহি বাংলাদেশীয়ে টালি-টোপোলা বান্ধিব লাগিব বুলি কৈছিল, আমি আৰু অসমৰ জনসাধাৰণে মানি লৈছিলো সেই কথা। কিন্তু কালি হিমন্ত বিশ্বই নতুন ভিত্তিবৰ্ষৰ কথা কৈছে।” অতুল বৰাই কয়।

অতুল বৰাৰ মতে, “পঞ্চায়ত নিৰ্বাচনত মুখ্য মন্ত্ৰী আৰু বিত্ত মন্ত্ৰী হিমন্তই মিত্ৰতাৰ কথা কৈছিল। কিন্তু ৰঞ্জিত দাসে বাৰে বাৰে সুকীয়াকৈ খেলাৰ কথা কৈছিল। একেদৰে  আমাৰ তৃণমূল কৰ্মীয়েও অকলে খেলাৰ কথা কৈছিল। সেয়ে তৃণমূল কৰ্মীৰ কাৰণে আমি অকলে খেলাৰ সিদ্ধান্ত ললো।”

ইপিনে ‘কংগ্ৰেছৰ লগত কেতিয়াও মিত্ৰতা কৰি নিৰ্বাচন খেলা নাই।’ বুলিও স্পষ্ট কৰে বৰাই। “আমাক সমালোচনা কৰাৰ অধিকাৰ তৰুণ গগৈৰ নাই।” তৰুণ গগৈক উভতি ধৰি কয় অতুল বৰাই। উল্লেখযোগ্য যে প্ৰাক্তন মুখ্য মন্ত্ৰী তৰুণ গগৈয়ে আজি এখন সংবাদমেলত ‘বিজেপিয়ে পদে পদে অপমান কৰি থকাৰ পিছতো কেনেকৈ লগত থাকিব পাৰিছে’ বুলি অগপক প্ৰশ্ন কৰিছিল।