দেশৰ আগশাৰীৰ স্বাস্থ্যসেৱাৰ প্ৰতিষ্ঠান সৰ্ব ভাৰতীয় আয়ুৰ্বিজ্ঞান প্ৰতিষ্ঠান(এইমছ)ৰ দুটা একাউন্টৰ পৰা প্ৰৱঞ্চকে ভুৱা চেক (cloned cheques)ৰ জৰিয়তে ১২ কোটিকৈ টকা উলিয়াই নিয়াৰ ঘটনাই চাঞ্চল্যৰ সৃষ্টি কৰিছে।
সংবাদ প্ৰতিষ্ঠানৰ বাতৰি মতে উক্ত টকাখিনি ভাৰতীয় ষ্টেট বেংকত থকা এইমছৰ একাউন্টৰ আন চহৰৰ নন হোম ব্ৰাঞ্চৰ পৰা অবৈধভাৱে উলিয়াই নিয়া হৈছে।
আনকি এই প্ৰৱঞ্চনাৰ সম্ভেদ লাভ কৰাৰ পাছতো অপৰাধীসকলে ভুৱা চেক (cloned cheques)ব্যৱহাৰ কৰি এছ বি আইৰ দেৰাডুন আৰু মুম্বাইত থকা নন হোম ব্ৰাঞ্চৰ পৰা ২৯ কোটি টকা উলিয়াই নিয়াৰ প্ৰচেষ্টা চলায়।
অৱশ্যে, প্ৰৱঞ্চকৰ এই প্ৰচেষ্টা ব্যৰ্থ হয়। এছ বি আইয়ে ইতিমধ্যে ইয়াৰ সকলো ব্ৰাঞ্চকে সতৰ্ক কৰি দিয়াৰ বাবে আৰু অধিক ক্ষতিৰ সন্মুখীন হোৱাৰ পৰা ৰক্ষা পৰে এইমছ।
সূত্ৰসমূহে প্ৰকাশ কৰা মতে, এইমছৰ সঞ্চালকে চলোৱা প্ৰতিষ্ঠানটোৰ এছ বি আইৰ মূল একাউন্টটোৰ পৰা প্ৰৱঞ্চকে ৭কোটি টকা উলিয়াই নিছে। বাকী ৫কোটি টকা এইমছৰ ৰিচাৰ্ছ বিভাগৰ ডীনৰ অধীনত থকা একাউন্টৰ পৰা উলিয়াই নিয়া হৈছে।
হাস্পাতালখনৰ প্ৰশাসনে ইতিমধ্যে এই কেলেংকাৰিটোৰ তদন্ত বিচাৰি দিল্লী আৰক্ষীৰ অৰ্থনৈতিক অপৰাধ শাখাৰ ওচৰত গোচৰ দাখিল কৰিছে।
ইপিনে, স্বাস্থ্য মন্ত্ৰালয়লৈ দিয়া প্ৰতিবেদনত এইমছৰ ফলাৰ পৰা কোৱা হৈছে যে প্ৰৱঞ্চকসকলে জমা কৰা আৰু এছ বি আইৰ ব্ৰাঞ্চে আল্ট্ৰা ভায়’লেট টেষ্টত পাছ কৰাই দিয়া চেকখনৰ অৰিজিনেল চেকখন এতিয়াও প্ৰতিষ্ঠানটোৰ জিম্মাতে আছে।
প্ৰাথমিক অনুসন্ধানত এইমছৰ কোনো বিষয়া এই প্ৰৱঞ্চনাৰ ঘটনাৰ সৈতে জড়িত থকাৰ প্ৰমান নাই বুলি কোৱা হৈছে।
বাতৰিত কোৱা হৈছে যে এছ বি আইয়ে নন হোম ব্ৰাঞ্চৰ চেক ক্লিয়াৰিং কৰোতে ভেৰিফিকেশ্যন প্ৰট’কল অনুসৰণ কৰাত ব্যৰ্থ হৈছে।
বাতৰি অনুসৰি বেংকটোক হৰলুকি হোৱা ধনখিনি একাউন্টত জমা কৰিবলৈ নিৰ্দেশ দিয়া হৈছে।
