বায়ু সেনাৰ মহাবিদ্যালয় চৌহদত উদ্ধাৰ কেডেট প্ৰশিক্ষাৰ্থীৰ মৃতদেহ: হত্যাৰ অভিযোগৰ আঙুলি ছয় বিষয়ালৈ
বাংগালুৰুস্থিত বায়ু সেনাৰ মহাবিদ্যালয় চৌহদত এগৰাকী ২৭ বৰ্ষীয় কেডেট প্ৰশিক্ষাৰ্থীৰ মৃতদেহ উদ্ধাৰক লৈ সৃষ্টি হৈছে তীব্ৰ চাঞ্চল্যৰ। বাংগালুৰুৰ জালাহাল্লিত থকা বায়ু সেনা কাৰিকৰী মহাবিদ্যালয়ত শনিবাৰে প্ৰশিক্ষাৰ্থী গৰাকীৰ মৃতদেহ উদ্ধাৰ কৰা হৈছে।
ইফালে মৃতদেহটো উদ্ধাৰৰ পিছতে বায়ু সেনাৰ ছয়গৰাকী বিষয়াৰ বিৰুদ্ধে হত্যাৰ অভিযোগ উত্থাপন হৈছে। মৃত প্ৰশিক্ষাৰ্থী গৰাকীক অংকিত কুমাৰ ঝা বুলি চিনাক্ত কৰা হৈছে।
এগৰাকী আৰক্ষী বিষয়াই সংবাদ মাধ্যমৰ আগত উল্লেখ কৰা অনুসৰি অংকিত কুমাৰ ঝাৰ বিৰুদ্ধে শেহতীয়াকৈ আদালতৰ তদন্তৰ নিৰ্দেশ দিয়া হৈছিল। ইয়াৰ পাছতে ঝাই এই চৰম পন্থা অৱলম্বন কৰিছে।
অংকিত কুমাৰ ঝাই তেওঁৰ চুইচাইড নোটত এয়াৰ কমোডৰ, উইং কমাণ্ডাৰ আৰু গ্ৰুপ কেপ্টেইনৰ পদবীত থকা কেইগৰাকীমান বিষয়াৰ নাম উল্লেখ কৰি গৈছে।
ইফালে মৃত ঝাৰ পৰিয়ালৰ সদস্যসকলে তেওঁ মহাবিদ্যালয় চৌহদত নিৰন্তৰ নিৰ্যাতন আৰু অত্যাচাৰৰ সন্মুখীন হৈছিল বুলি গুৰুতৰ অভিযোগ তুলিছে।
ইতিমধ্যে অংকিত ঝাৰ ভাতৃয়ে আৰক্ষীৰ ওচৰত এক এজাহাৰ দাখিল কৰিছে বুলি স্থানীয় এগৰাকী জেষ্ঠ আৰক্ষী বিষয়াই জানিবলৈ দিছে। তেওঁ উল্লেখ কৰা মতে ঝাৰ বিৰুদ্ধে তদন্তৰ নিৰ্দেশ দিয়া হৈছিল আৰু সেইদিনাই তেওঁক প্ৰশিক্ষণৰ পৰা আঁতৰাই দিয়া হৈছিল।
তেওঁৰ বিৰুদ্ধে আৰম্ভ কৰা এই অনুশাসনমূলক ব্যৱস্থাৰ পিছতে চৌহদৰ এটা কোঠাত ঝাক ওলমি থকা অৱস্থাত পোৱা গৈছিল বুলি আৰক্ষী বিষয়াগৰাকীয়ে লগতে সংবাদ মাধ্যমৰ আগত অৱগত কৰিছে।
ইয়ালে পৰিয়ালৰ সদস্যসকলৰ দ্বাৰা কৰা দাবী আৰু চুইচাইড নোটত থকা অভিযোগৰ ভিত্তিত ইতিমধ্যে তদন্ত আৰম্ভ কৰা হৈছে আৰু অভিযুক্তৰ বিৰুদ্ধে প্ৰমাণ সংগ্ৰহৰ চেষ্টা চলোৱা হৈছে বুলিও আৰক্ষী বিষয়াগৰাকীয়ে লগতে কয়।