শনিবাৰে পুৱা মধ্যপ্ৰদেশৰ মৰেনাৰ সমীপত ভাৰতীয় বায়ুসেনাৰ দুখন যুদ্ধ বিমান দুৰ্ঘটনাগ্ৰস্ত হয়। প্ৰশিক্ষণৰ সময়ত আই এ এফৰ দুখন যুঁজাৰু বিমান ক্ৰমে সুখয়-৩০ আৰু মিৰাজ-২০০০ বিমান দুখন দুৰ্ঘটনাগ্ৰস্ত হয়।
উক্ত দুই দুৰ্ঘটনাৰ ফলত এজন পাইলট নিহত হোৱাৰ লগতে দুজন আহত হৈছে। ইফালে দুৰ্ঘটনা সংঘটিত হোৱাৰ পাছতে বায়ুসেনাই দুয়োখন বিমান আকাশমাৰ্গতে সংঘৰ্ষত লিপ্ত হোৱাৰ ফলত দুৰ্ঘটনা সংঘটিত হ’ল নেকি সেই বিষয়ে তদন্ত অব্যাহত ৰাখিছে।
মৰেনাৰ উপায়ুক্তই প্ৰকাশ কৰিছে যে ইতিমধ্যে দুজন পাইলটক উদ্ধাৰ কৰা হৈছে। উদ্ধাৰ কৰা দুয়োজন পাইলটকে চিকিৎসাৰ বাবে গ্ৱালিয়ৰলৈ স্থানান্তৰ কৰা হয়। ইফালে তৃতীয়গৰাকী পাইলট শ্বহীদ হোৱা বুলি জানিব পৰা গৈছে।
সূত্ৰৰ পৰা পোৱা তথ্য অনুসৰি সুখোই-৩০ত দুজন পাইলট থকাৰ বিপৰীতে মিৰাজ-২০০০ত এজন পাইলট আছিল। মৰেনাৰ আৰক্ষী অধীক্ষক আশুতোষ বাগ্ৰীয়ে কয়, “আজি পুৱা গোৱালিয়ৰৰ পৰা ২ খন বিমান মিৰাজ আৰু সুখয় উৰা মাৰে। এখন বিমানত দুজন পাইলট আৰু আনখন বিমানত এজন পাইলট আছিল। দুজন পাইলটক উদ্ধাৰ কৰা হৈছে। এজন পাইলটৰ শৰীৰৰ অংগহে উদ্ধাৰ কৰা হৈছে। ভৰতপুৰতো বিমানখনৰ কিছু অংশ উদ্ধাৰ হোৱা বুলি জানিব পৰা গৈছে।”
একে সময়তে বায়ুসেনাই নিজৰ বিবৃতিত কয়, “আজি পুৱা গোৱালিয়ৰৰ সমীপত ভাৰতীয় বায়ুসেনাৰ দুখন যুদ্ধ বিমান দুৰ্ঘটনাগ্ৰস্ত হয়। বিমানকেইখন ৰুটিন অপাৰেচনেল ফ্লাইট ট্ৰেইনিং মিছনত আছিল। তিনিজন পাইলটৰ ভিতৰত এজন মাৰাত্মকভাৱে আঘাতপ্ৰাপ্ত হয়। দুৰ্ঘটনাৰ কাৰণ জানিবলৈ তদন্তৰ নিৰ্দেশ দিয়া হৈছে।”
প্ৰতিৰক্ষা সূত্ৰই জনোৱা মতে, দুয়োখন বিমানে তীব্ৰবেগত যুদ্ধ অভিযানত থকাৰ সময়তে আকাশৰ মাজভাগত সম্ভাৱ্য সংঘৰ্ষ সংঘটিত হয়। সবিশেষ তদন্তৰ পাছতহে জানিব পৰা যাব।
ইফালে ৰাজস্থানৰ ভৰতপুৰতো এখন বিমানৰ ধ্বংসাৱশেষ পোৱা গৈছে। কিন্তু সেয়া ভাৰতীয় বায়ুসেনাৰ বিমান নে চাৰ্টাৰ্ড বিমান সেয়া এতিয়াও স্পষ্ট হোৱা নাই। ভাৰতপুৰ জিলা দণ্ডাধীশে পূৰ্বৰ এক প্ৰতিবেদনত সেয়া চাৰ্টাৰ্ড জেট বিমানখন নিশ্চিত কৰিছিল। একে সময়তে প্ৰতিৰক্ষা সূত্ৰই নিশ্চিত কৰিছে যে ভাৰতীয় বায়ুসেনাৰ জেট বিমান সমীপত দুৰ্ঘটনাগ্ৰস্ত হৈছে।
