কিতাপ পঢ়ো আহক; মিজোৰামত ৰাজপথৰ ক্ষুদ্ৰ পুথিভঁৰালে দৃষ্টি কাঢ়িছে জনসাধাৰণৰ

সাক্ষৰতাৰ ফালৰ পৰা দেশত মিজোৰামৰ আগস্থান। শেহতীয়াভাৱে ছ’চিয়েল মিডিয়া যোগে ৰাজ্যখনৰ পথৰ দাতি সমূহত ক্ষুদ্ৰ লাইব্ৰেৰী স্থাপন সম্বন্ধীয় এটা পোষ্টৰ পৰা দেশে শিকিবলগীয়া যথেষ্টখিনি আছে।

পথৰ কাষত স্থাপন কৰা লাইব্ৰেবীৰৰ ফটো টুইটাৰত পোষ্ট কৰি আই এফ এছ বিষয়া প্ৰবীণ কাছৱানে লিখে, ‘‘এয়া হৈছে প্ৰতিখন চহৰে শিকিবলগীয়া কথা। মিজোৰামৰ ৰাজধানী আইজলত এনেকুৱা বহু লাইব্ৰেৰী আছে। ৰাষ্ট্ৰ নিৰ্মাণৰ ক্ষেত্ৰত লাইব্ৰেৰীৰ অৱদান অপুৰণীয় আৰু উত্তৰ-পূবে সেই পথ দেখুৱাইছে।’’

উল্লেখযোগ্য যে, শিশুসকলৰ মাজত পঢ়াৰ অভ্যাস বৃদ্ধি কৰাৰ বাবে এনেধৰণে পথৰ দাতিত লাইব্ৰেৰী সমূহ স্থাপন কৰা হৈছে।

ইয়াৰ উপৰি উক্ত লাইব্ৰেৰী সমূহৰ পৰা বিনামূলীয়াকৈ লাভ কৰা কিতাপে অঞ্চলটোৰ সমাজ গঠনতো গুৰুত্বপূৰ্ণ ভূমিকা পালন কৰিছে।

এই কাৰ্য্যক প্ৰশংসা কৰি এজন টুইটাৰ ব্যৱহাৰকাৰীয়ে লিখিছে, ‘‘ এয়া সুন্দৰ নহয়নে? কেইবছৰমান অগত ডিমাপুৰত এনেধৰণৰ প্ৰচেষ্টাৰ বালতেই ৰাজহুৱা লাইব্ৰেৰী নিৰ্মাণ কৰা সম্ভৱ হৈ উঠিছিল।’’

‘‘মই এতিয়াও শিশু লাইব্ৰেৰীলৈ যাও আৰু কিতাপ সংগ্ৰহ কৰো। মই শিশু কালত বহু ভাল ভাল কিতাপ পঢ়াৰ সুযোগ নাপালো সেয়েহে এতিয়া সকলো ধৰণৰ কিতাপ অধ্যায়ণ কৰি সেই অভাৱ পুৰণ কৰিব বিচাৰিছো,’’ আন এগৰাকী টুইটাৰ ব্যৱহাৰকাৰীয়ে লিখে।

উল্লেখযোগ্য যে, অসমতো অসম আন্দোলনৰ সময়ত গাঁৱে-গাঁৱে মানুহৰ মাজত অধ্যয়ন অভ্যাস বৃদ্ধি কৰাৰ বাবে গ্ৰাম্য পুথিভঁৰাল নিৰ্মাণ কৰা হৈছিল যদিও বৰ্তমান সময়ত চৰকাৰৰ অনীহাৰ বাবে এই পুথিভঁৰাল সমূহ প্ৰায় বিলুপ্তিৰ পথত অগবাঢ়িছে।