দৃশ্যপট সলনি, উপ মুখ্য মন্ত্ৰী অজিত পাৱাৰৰ পদত্যাগ; আস্থাভোটৰ পূৰ্বেই বিজেপিৰ মুখথেকেচা!
আস্থাভোটৰ পূৰ্বেই পদত্যাগ কৰিলে মহাৰাষ্ট্ৰৰ উপ মুখ্য মন্ত্ৰী অজিত পাৱাৰে। এন চি পিৰ নেতাসকলৰ সৈতে মঙলবাৰে পৃথকে পৃথকে বৈঠকত মিলিত হোৱাৰ পাছতে এই সিদ্ধান্ত গ্ৰহণ কৰে পাৱাৰে।
সংবাদ মাধ্যমৰ বাতৰি অনুসৰি, মুখ্য মন্ত্ৰী দেবেন্দ্ৰ ফাৰ্ণবিছৰ সৈতে সাক্ষাৎ কৰাৰ পাছতেই পাৱাৰে তেওঁৰ পদত্যাগ পত্ৰ প্ৰেৰণ কৰে।
বিৰোধী শিবিৰে দাবী কৰা মতে সংখ্যা গৰিষ্ঠতা নথকাৰ বাবেই অজিত পাৱাৰে এইদৰে পদত্যাগ কৰে।
ইপিনে, এন চি পিৰ জ্যেষ্ঠ নেতা ছগন ভুজবলে ইয়াৰ পূৰ্বেই অজিত পাৱাৰ দললৈ প্ৰত্যাৱৰ্তন কৰাৰ ইংগিত দিয়াৰ দাবী কৰিছিল।
দলটোৱে অজিত পাৱাৰে বিজেপিৰ সৈতে হাত মিলাই উপ মুখ্য মন্ত্ৰী হোৱাৰ পাছৰে পৰাই তেওঁক দললৈ ঘুৰাই অনাৰ প্ৰচেষ্টা অব্যাহত ৰাখিছিল।
ইমানদিন এন চি পিৰ নেতাসকলক কোনো গুৰুত্ব নিদিয়া অজিত পাৱাৰে তেওঁৰ সংগীকেইজন এজন এজনকৈ শাৰদ পাৱাৰ শিৱিৰলৈ প্ৰত্যাৱৰ্তন কৰাৰ পাছত অৱশেষত আজি দলটোৰ নেতাসকলৰ সৈতে আলোচনাত মিলিত হয়।
জানিব পৰা মতে, অজিত পাৱাৰে দলৰ নেতাসকলৰ সৈতে এক গোপন স্থানত মিলিত হয়। প্ৰায় এঘন্টা ধৰি হোৱা আলোচনাৰ পাছত তেওঁ দলৰ মুৰব্বী শাৰদ পাৱাৰ তথা দলটোৰ নেত্ৰী সুপ্ৰিয়া সূলেৰ সৈতেও কথা পাতে।
দলটোৰ নেতাসকলে অজিত পাৱাৰক সংখ্যা গৰিষ্ঠতা নোহোৱাৰ কথা উনুকিয়াই দি পদত্যাগ কৰাৰ পৰামৰ্শ দিয়ে। উপ মুখ্য মন্ত্ৰী পাৱাৰে এই সম্পৰ্কত মুখ্য মন্ত্ৰী ফাৰ্ণবিছক সাক্ষাৎ কৰি প্ৰায় বিশ মিনিট সময় কথা পাতে।
মুখ্য মন্ত্ৰী ফাৰ্ণবিছ সাক্ষাৎ কৰাৰ পাছত তেওঁ ভাতৃ শাৰদ পাৱাৰৰ গৃহত উপস্থিত হয় আৰু নিজৰ পদত্যাগ পত্ৰ প্ৰেৰণ কৰে। আস্থাভোটৰ পূৰ্বেই তেওঁ এন চি পি শিবিৰলৈ উভতি আহিব বুলি জানিব পৰা গৈছে।
আনহাতে, আস্থাভোটৰ বাবে বিৰোধী কংগ্ৰেছকে ধৰি বাকীসকলে প্ৰস্তুতি তীব্ৰতৰ কৰি তুলিছে। কংগ্ৰেছে আজি বিয়লি ৫ বজাত বিধায়িনী দলৰ বৈঠক আহ্বান কৰিছে।