সোণাপুৰৰ যোগদলত নতুন টোলগেট স্থাপনৰ বিৰোধিতাৰে অসম জাতীয়তাবাদী যুৱ পৰিষদৰ মুখ্য মন্ত্ৰীলৈ স্মাৰক পত্ৰ
সোণাপুৰৰ যোগদলত নতুন টোলগেট স্থাপনৰ বিৰোধিতা কৰি ডিমৰীয়া আঞ্চলিক অসম জাতীয়তাবাদী যুৱ ছাত্ৰ পৰিষদে সোণাপুৰ ৰাজহ চক্ৰৰ চক্ৰ বিষয়াৰ জৰিয়তে মুখ্য মন্ত্ৰীলৈ স্মাৰক পত্ৰ প্ৰেৰণ কৰে।
যি সময়ত অসমৰ প্ৰায়বোৰ ৰাষ্ট্ৰীয় ঘাইপথৰ অৱস্থা জৰাজীৰ্ণ আৰু পুতৌ লগা, য’ত এঘন্টাৰ ৰাস্তা অতিক্ৰম কৰিবলৈ দুঘন্টাৰ প্ৰয়োজন হয় সেই ৰাষ্ট্ৰীয় ঘাইপথ সমূহ উন্নীত নকৰাকৈ কেৱল মাত্ৰ অৰ্থ সংগ্ৰহৰ বাবে এখন টোলগেট মুকলি কৰাটো অসমবাসীৰ বাবে অতি দূৰ্ভাগ্যজনক বিষয় বুলি স্মাৰক পত্ৰত উল্লেখ কৰে সংগঠনটোৱে।
‘‘ৰহাৰ টোলগেটক লৈ এখন সংগ্ৰাম চলি থকাৰ সময়ত ভাৰত চৰকাৰে অবৈধভাৱে টোল কৰ সংগ্ৰহৰ ব্যৱস্থা গ্ৰহণ কৰি অবৈধ টোল গেটৰ বিৰুদ্ধে নিষ্ঠা সহকাৰে সগ্ৰাম অব্যাহত ৰখা অসমৰ ৰাইজ আৰু দল সংগঠনৰ দাৱীক নাস্যাৎ কৰিলে,’’ স্মাৰকপত্ৰত উল্লেখ।
সোণাপুৰৰ যোগদলত সমগ্ৰ ৰাইজ আৰু জাতীয় দল সংগঠনৰ দাৱী আৰু আবেগ অনূভূতিক প্ৰত্যাখান কৰি পুনৰ এখন টোলগেট প্ৰতিষ্ঠা কৰি অসমৰ অৰ্থ সংকটৰ সময়ত অতিৰিক্ত কৰৰ বোজা জাপি দি জনসাধাৰণক এক অন্ধকাৰ ভবিষ্যতৰ পিনে ঠেলি দিয়াটো দৃষ্টিগোচৰ হোৱা বুলিও উল্লেখ কৰে স্মাৰক পত্ৰ খনত।
ৰাজইৰ স্বাৰ্থত টোল কৰ সংগ্ৰহ বন্ধ কৰি এই টোলগেট মুকলিৰ সিদ্ধান্ত চৰকাৰে প্ৰত্যাহাৰ কৰিব বুলি আশা প্ৰকাশ কৰে অসম জাতীয়তাবাদী যুৱ ছাত্ৰ পৰিষদ ডিমৰীয়া আঞ্চলিক সমিতিয়ে।