নিয়াৰ গোচৰৰ পৰা মুক্ত হৈ আজি কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে জামিন লাভ কৰিছিল।
কিন্তু, কৃষক নেতাগৰাকীৰ কাৰাগাৰৰ পৰা মুকলি আকাশৰ তললৈ অহাৰ সম্ভাৱনা নাইকিয়া হৈ পৰিছে।
পুনৰ গ্ৰেপ্তাৰ হ’ব পাৰে অখিল গগৈ। অখিল গগৈৰ বিৰুদ্ধে উজনি অসমৰ কেইবাখনো থানাত বহুকেইটা গোচৰ ৰুজু হৈ আছে।
চাবুৱা, গৌৰীসাগৰ, শিৱসাগৰ, টিয়ককে ধৰি অন্য বহুকেইখন থানাত অখিলৰ বিৰুদ্ধে কেইবাটাও গোচৰ ৰুজু হৈ আছে বুলি জানিব পৰা গৈছে।
অখিলৰ বিৰুদ্ধে টীয়ক থানাত ৬৯৫/১৯, শিৱসাগৰ থানাত ১৩৪৪/১৯ গৌৰীসাগৰ থানাত ১৫৪/১৯ আৰু চাবুৱা থানাত ২৮৯/১৯ নম্বৰত ভাৰতীয় দণ্ডবিধিৰ ১২০বি/ ১৪৭/ ১৪৮/ ১৪৯/ ৩৩৬/ ৩৫৩/ ৩২৬/ ৩০৭ ধাৰাত গোচৰ ৰুজু হৈ আছে।
শিৱসাগৰ মুখ্য ন্যায়িক দণ্ডাধীশ আদালতত shown arrest -বাবে উক্ত গোচৰৰ ভিত্তিত শিৱসাগৰ আৰু গৌৰীসাগৰ আৰক্ষীয়ে আবেদন জনাইছে বুলি জানিব পৰা গৈছে। সেই আবেদন মঞ্জুৰ কৰিছে শিৱসাগৰ মুখ্য ন্যায়িক দণ্ডাধীশ আদালতে।
যিকোনো মুহূৰ্তত গুৱাহাটী কেন্দ্ৰীয় কাৰাগাৰৰ পৰা শিৱসাগৰ আৰক্ষীয়ে গ্ৰেপ্তাৰ কৰিব কৃষক নেতা অখিল গগৈক।
উল্লেখযোগ্য যে, আজি ৰাতিপুৱা নিয়াৰ আদালতত জামিন আবেদন দাখিল কৰিছিল অখিলৰ অধিবক্তাই।
অখিলৰ হৈ আদালতত যুক্তি দৰ্শাই জ্যেষ্ঠ অধিবক্তা জিয়াউৰ কামাৰে। সেই আবেদনৰ ভিত্তিত নিয়া আদালতে ৩০ হাজাৰ টকা জৰিমনা আৰু এগৰাকীৰ চিকিউৰিটিত অখিল গগৈৰ জামিন মঞ্জুৰ কৰে।
কালি নিয়াই অভিযোগ নামা দাখিলৰ বাবে পুনৰ ৯০ দিনৰ সময় বিচাৰি আবেদন জনাইছিল যদিও কিন্তু সেই আবেদন নিয়াৰ আদালতে খাৰিজ কৰে।
ইপিনে, বাৰম্বাৰ এটাৰ পাছত আন এটা গোচৰ জাপি দি কৃষক নেতাগৰাকীক গ্ৰেপ্তাৰ কৰাটো চৰকাৰৰ এক ষড়যন্ত্ৰ আখ্যা দিয়ে কৃষক মুক্তি সংগ্ৰাম সমিতিৰ নেতা মুকুট ডেকাই।
