জনজাতিকৰণৰ দাবীত ৫ জানুৱাৰিত দিল্লীত প্ৰতিবাদত নামিব আক্ৰাছু
কোচ ৰাজবংশীসকলৰ জনজাতিকৰণৰ দাবীত অহা ৫ জানুৱাৰিত দিল্লীৰ যন্তৰ-মন্তৰত কোচ ৰাজবংশী সংগ্ৰাম সমিতিয়ে প্ৰতিবাদী ধৰ্ণা কাৰ্যসূচী ৰূপায়ণ কৰিব।
সংগঠনটোৰ সভাপতি অতুল ৰায় আৰু সাধাৰণ সম্পাদক জীৱেশ ৰায়ে তেওঁলোকৰ এই সিদ্ধান্তৰ কথা জানিবলৈ দি কয় যে কেন্দ্ৰ আৰু ৰাজ্য চৰকাৰে অসমৰ কোচ ৰাজবংশী সমাজক জনজাতিকৰণৰ নামত ইমানদিনে কেৱল প্ৰতাৰণা কৰি আহিছে।
কোচ ৰাজবংশীসকলে দীৰ্ঘদিনৰ পৰা দাবী কৰি তেওঁলোকৰ আৰ্থ-সামাজিক, ৰাজনৈতিক, শৈক্ষিক আৰু সাংস্কৃতিকে ধৰি সামগ্ৰিক দিশৰ উত্তৰণ আৰু বিকাশৰ বাস্তৱসন্মত আৰু সন্মানজনকভাৱে সমাধান হোৱাটো বিচাৰে বুলি উল্লেখ কৰি নেতাদ্বয়ে কয় যে বিজেপি নেতৃত্বাধীন কেন্দ্ৰীয় আৰু ৰাজ্য চৰকাৰৰ তেওঁলোকৰ এই দাবীটো সমাধান কৰাৰ ক্ষেত্ৰত যদি তিলমানো সদিচ্ছা আছে তেন্তে সংসদৰ চলিত শীতকালীন অধিৱেশনতে জনজাতিকৰণৰ বিধেয়ক উত্থাপন কৰি কোচ ৰাজবংশীসকলৰ আত্মনিয়ন্ত্ৰণৰ সংগ্ৰামক মান্যতা প্ৰদৰ্শন কৰক।
তেওঁলোকৰ দাবীৰ সমৰ্থনত অহা ৫ জানুৱাৰিত দিল্লীত ধৰ্ণা কাৰ্যসূচী ৰূপায়ণ কৰিব বুলি জানিবলৈ দি নেতাদুগৰাকীয়ে কেইবাদশক ধৰি জনাই অহা উক্ত দাবী সমাধানৰ বাবে কোচ ৰাজবংশী সমাজ অনন্তকাললৈ অপেক্ষা কৰি নাথাকে বুলি সকিয়াই দিয়ে।