সদৌ ভাৰত কৃষি আৰু গ্ৰামীণ শ্ৰমিক সন্থাৰ আহ্বান ক্ৰমে দেশব্যাপি “ক্ষুধা নিবাৰণ কৰক, ক’ৰ’না ধ্বংস কৰক” শীৰ্ষক প্ৰতিবাদৰ প্ৰচাৰ কাৰ্যসূচী দেশৰ লগতে অসমতো ৰূপায়ন কৰা হয়।
সদৌ অসম গ্ৰামীণ শ্ৰমিক সন্থাৰ অসম ৰাজ্যিক সমিতিৰ সাধাৰণ সম্পাদক তথা মাইক্ৰফাইনেঞ্চ শোষণ বিৰোধী যৌথ সংগ্ৰামী মঞ্চৰ মুখ্য আহ্বায়ক অৰূপ কুমাৰ মহন্তই আজি এক প্ৰেছ বিজ্ঞপ্তিৰ জড়িয়তে এই কথা জনাইছে।
সদৌ ভাৰত কৃষি আৰু গ্ৰামীণ শ্ৰমিক সন্থাৰ এই প্ৰেছ বিবৃতিত লকডাউনৰ পৰিপ্ৰেক্ষিতত ৰেচন কাৰ্ড নথকা সকলো পৰিয়ালক ৰেচন প্ৰদান, কৃষি কৰ্মক “এম জি এনৰেগাৰ” লগত যুক্ত কৰা, সকলো দৰিদ্ৰ পৰিয়ালক দহ হাজাৰ টকাকৈ লকডাউন ভাট্টা প্ৰদান কৰা, মাইক্ৰফাইনেঞ্চকে ধৰি সকলো ঋণ মাফ দিয়া আৰু ৰেচনৰ তালিকাত কণী, নিমখ, মিঠাতেল, চেনী, দাইল যুক্ত কৰাৰ বাবে চৰকাৰক দাবী জনায়।
সন্থাৰ আহ্বানত এই কাৰ্যসূচী ৰাজ্যখনৰ দহখন জিলা ক্ৰমে গোৱালপাৰা, মৰিগাঁও, নগাঁও, হোজাই, গোলাঘাট, শিৱসাগৰ, যোৰহাট, ডিব্ৰুগড়, তিনিচুকীয়া আৰু হাইলাকান্দিৰ শতাধিক গাঁৱত ৰূপায়ণ কৰা হয়।
সদৌ ভাৰত কৃষি আৰু গ্ৰামীণ শ্ৰমিক সন্থাৰ এই কাৰ্যসূচীত মাইক্ৰফাইনেঞ্চ শোষণ বিৰোধী মঞ্চৰ গ্ৰাম্য অৰ্থনীতিৰ সুৰক্ষা মঞ্চৰ লগতে জীপাল কৃষক শ্ৰমিক সংঘ, গোৱালপাৰা কৃষ্ণাইৰ ঠেলা মুটিয়া শ্ৰমিক সন্থা, কৃষক গৰীৱ ন্যায় সন্থা, অসম, মজুৰী শ্ৰমিক য়ুনিয়ন, প্ৰতিবাদী সজাগতা মহিলা মঞ্চ, খিলঞ্জীয়া গণমঞ্চ, সদৌ অসম চাহ জনগোষ্ঠী অধিকাৰ সংগ্ৰাম সমিতি, সদৌ, অসম প্ৰগতিশীল নাৰী অধিকাৰ সংগ্ৰাম সমিতিক, অসম ছাত্ৰ যুৱ সন্মিলনকে ধৰি কেইবাটাও সংগঠনে এই কাৰ্যসূচীত অংশগ্ৰহণ কৰে।
