ভাৰতীয় খাদ্য নিগমৰ উত্তৰ-পূব মণ্ডলৰ উদ্যোগত অহা ২১ ফেব্ৰুৱাৰিৰ পৰা গুৱাহাটীৰ নেহৰু ষ্টেডিয়ামত অনুষ্ঠিত হ’ব অল ইণ্ডিয়া পাব্লিক চেক্টৰ ফুটবল টুৰ্নামেন্ট, ২০১৯।
বুধবাৰে গুৱাহাটীৰ উলুবাৰীত থকা মাণ্ডলিক কাৰ্য্যালয়ত এখন সংবাদমেল অনুষ্ঠিত কৰি এই কথা জানিবলৈ দিয়ে প্ৰতিযোগিতাৰ আয়োজক খাদ্য নিগমৰ উত্তৰ-পূবৰ মাণ্ডলিক মুখ্য প্ৰবন্ধক মনোজ কুমাৰ গগৈয়ে।
প্ৰতিযোগিতাখনত অ’ এন জি চি, অইল ইণ্ডিয়া লিমিটেড, ৰিজাৰ্ভ বেংক অৱ ইণ্ডিয়াকে ধৰি ৰাজহুৱা খণ্ডৰ ১২ টা প্ৰতিষ্ঠানৰ ফুটবল দলে অংশ ল’ব। ইতিমধ্য আটাইকেইটা দল গুৱাহাটীত উপস্থিত হোৱা বুলি মুখ্য প্ৰবন্ধক গগৈয়ে জানিবলৈ দিয়ে।
দলসমূহত দেশৰ কেইবাগৰাকীও আগশাৰীৰ ফুটবলাৰ আছে বুলিও আয়োজকসকলে প্ৰকাশ কৰিছে।
ইপিনে আয়োজকৰ ১৬ জনীয়া ফুটবল দলটোত তিনিজন অসমৰ খেলুৱৈ আছে। তেওঁলোক ক্ৰমে গোবিন্দ বড়ো, ৰাকেব বসুমতাৰী আৰু বিৰখডো বসুমতাৰী। কিন্তু মূল দলটোত কোনে কোনে স্থান পায় সেয়া নিশ্চিত হোৱা নাই।
২১ ফেব্ৰুৱাৰিৰ পুৱা ৯ বজাত নেহৰু ষ্টেডিয়ামত প্ৰতিযোগিতাৰ আৰম্ভণি অনুষ্ঠানত ভাৰতীয় খাদ্য নিগমৰ উত্তৰ-পূব মণ্ডলৰ কাৰ্য্যবাহী সঞ্চালক এ কে সিনহা মুখ্য অতিথি হিচাপে উপস্থিত থাকিব।
