ৰাজ্য কঁপোৱা শিৱসাগৰৰ ‘স্বপ্নালয়’ নামৰ অনাথ আশ্ৰয় গৃহত কিশোৰীক যৌন নিৰ্যাতন চলাই বৰ্তমান পলাতক অৱস্থাত থকা স্নেহালয়ৰ পৰিচালক পৰাগ গোস্বামীক আজিলৈকে শিৱসাগৰ আৰক্ষীয়ে গ্ৰেপ্তাৰ কৰিব নোৱাৰাৰ প্ৰতিবাদত ২৯ ডিচেম্বৰত শিৱসাগৰৰ উপায়ুক্তৰ কাৰ্য্যালয়ৰ সন্মুখত ২০ টা সংগঠনে যৌথ ভাৱে অৱস্থান ধৰ্মঘট পালন কৰে।
এজাহাৰ দাখিল কৰা ২৪ ঘণ্টাৰ পাছতো আৰক্ষীয়ে পৰাগ গোস্বামীক গ্ৰেপ্তাৰ কৰিব নোৱাৰা কাৰ্য্যত ক্ষোভ প্ৰকাশ কৰাৰ লগতে যৌথ সংগ্ৰামী মঞ্চই ২৪ ঘণ্টাৰ সময়সীমা বান্ধি দিছে শিৱসাগৰ আৰক্ষীক। অন্যথা ২০ টা সংগঠনে পৰৱৰ্ত্তী সময়ত সম্পূৰ্ণ উলংগ হৈ প্ৰতিবাদত নামিব বুলি হুংকাৰ দিয়ে।
লগতে শিৱসাগৰ আৰক্ষীয়ে পৰাগ গোস্বামীক ৰক্ষণাবেক্ষণা দিয়াৰ অভিযোগ আনি ২০ টা সংগঠনৰ বিষয়ববীয়াই স্বাক্ষৰ কৰি জিলা উপায়ুক্তৰ যোগেদি দেশৰ প্ৰধান মন্ত্ৰীলৈ পৰাগ গোস্বামীক ২৪ ঘন্টাৰ ভিতৰত গ্ৰেপ্তাৰ কৰি নিৰ্যাতিতা যুৱতী গৰাকীক ন্যায় প্ৰদানৰ দাবী তুলি স্মাৰকপত্ৰ প্ৰেৰণ কৰে।
ধৰ্মঘটস্থলীতেই এখন প্ৰতিবাদী সভা অনুষ্ঠিত হয় আৰু পৰাগ গোস্বামীক গ্ৰেপ্তাৰ কৰাৰ ক্ষেত্ৰত শিৱসাগৰ আৰক্ষীৰ ব্যৰ্থতাক সকলোৱে এক মুখে ধিক্কাৰ দিয়ে। প্ৰতিবাদী সভাত পৰাগ গোস্বামীক ২৪ ঘন্টাৰ ভিতৰত গ্ৰেপ্তাৰ কৰা, স্বপ্নালয়ত ঘটা সকলো বিলাক যৌন নিৰ্যাতনৰ ঘটনাৰ চি বি আইৰ জৰিয়তে তদন্ত কৰা, স্বপ্নালয়ে লাভ কৰা চৰকাৰী অনুদান আৰু ৰাইজৰ দান-বৰঙণিৰ খাতিয়ান ৰাজহুৱা কৰাৰ লগতে পৰাগ গোস্বামীৰ নেতৃত্বধীন চেপ নামৰ এন জি অ’ টোৰ অনুজ্ঞাপত্ৰ বাতিল কৰিবলৈ দাবী উত্থাপন কৰে।
