পত্নীসহ হাঙ্গাৰিৰ ৰাষ্ট্ৰদূত গীয়োলা পেথ’ৰ শিৱসাগৰ ভ্ৰমণ: উপায়ুক্তৰ সৈতে পৰ্যটন সন্দৰ্ভত আলোচনা

শিৱসাগৰ জিলাৰ উপায়ুক্ত ডাঃ এম এছ লক্ষ্মীপ্ৰিয়াই দেওবাৰে শিৱসাগৰ জিলা ভ্ৰমণলৈ অহা হাঙ্গাৰিৰ ৰাষ্ট্ৰদূত গীয়োলা পেথ’ (Gyula Pethő) আৰু তেওঁৰ সহধৰ্মিণীক স্থানীয় আৱৰ্ত ভৱনত উষ্ম আদৰণি জনায়।

তদুপৰি, শিৱসাগৰৰ আৰক্ষী অধীক্ষক অমিতাভ সিনহায়ো দুয়োগৰাকী অতিথিক সম্ভাষণ জনায়।

সপত্নীক ৰাষ্ট্ৰদূত গৰাকীয়ে জিলাখনৰ বিভিন্ন ঐতিহাসিক কীৰ্তিচিহ্ন আৰু পৰ্যটনস্থলী ভ্ৰমণ কৰে। উপায়ুক্ত গৰাকীয়ে এই ভ্ৰমণকালত তেওঁলোকক সংগ প্ৰদান কৰে।

তেওঁলোকে ভ্ৰমণকালত ৰংঘৰ, তলাতল ঘৰ, ন-পুখুৰী স্থিত শিৱদ’ল আদি পৰিদৰ্শন কৰে।

পৰিদৰ্শন কালত উপায়ুক্ত গৰাকীয়ে জিলাখনৰ পৰ্যটন ক্ষেত্ৰৰ উন্নয়নৰ বাবে গ্ৰহণ কৰা “Soulful Sivasagar” অভিযান আৰু ভৱিষ্যত পৰিকল্পনাসমূহৰ বিষয়ে অৱগত কৰে।

ৰাষ্ট্ৰদূত গৰাকীয়েও এই সন্দৰ্ভত বিভিন্ন পৰামৰ্শ আগবঢ়ায়। তেওঁলোকে জিলাখনৰ ঐতিহ্য আৰু সংস্কৃতিৰ বিষয়ে উৎসুকতাৰে আৰু সবিস্তাৰে বুজ লয়।

দুপৰীয়া ৰাষ্ট্ৰদূত গৰাকীয়ে তেওঁৰ পত্নীৰ সৈতে থলুৱা পাৰম্পৰিক খাদ্যসম্ভাৰৰ জুতি লয়। দুয়োগৰাকী অতিথিয়ে থলুৱা পিঠা-পনা আৰু খাদ্য গ্ৰহণ কৰি আপ্লুত হৈ পৰে।

ৰাষ্ট্ৰদূত আৰু তেওঁৰ পত্নী দুয়োগৰাকীয়ে জিলা প্ৰশাসনৰ পৰা লাভ কৰা আতিথ্যৰ বাবে জিলা উপায়ুক্তক আন্তৰিকতাৰে ধন্যবাদ জনায়।

তেওঁলোকে জিলাখনৰ সৰ্বাংগীন উন্নয়নৰ লগতে “Soulful Sivasagar” অভিযানৰ পূৰ্ণ সফলতা কামনা কৰে।