ডায়েবেটিছ নিয়ন্ত্ৰণ কৰা মানে কেৱল মিঠাই খোৱা বাদ দিয়া বা কমকৈ খোৱা নহয়। আপুনি কেতিয়া, কেনেকৈ আৰু কি খাদ্য খাইছে, সেই কথাও তেজত চেনিৰ মাত্ৰা নিয়ন্ত্ৰণ কৰাত এক গুৰুত্বপূৰ্ণ ভূমিকা পালন কৰে। বিশেষজ্ঞসকলৰ মতে, ভাত বা ৰুটি খোৱাৰ আগতে যদি এণ্টি-অক্সিডেণ্ট আৰু ফাইবাৰযুক্ত চালাড এবাটি খোৱাৰ অভ্যাস গঢ়ি তুলিব পাৰি, তেন্তে আহাৰ খোৱাৰ পিছত তেজত চেনিৰ মাত্ৰা হঠাতে বৃদ্ধি পোৱা বহু পৰিমাণে হ্ৰাস কৰিব পৰা যায়। বিশেষকৈ টাইপ-২ ডায়েবেটিছ আৰু প্ৰি-ডায়েবেটিছত আক্ৰান্ত লোকসকলৰ বাবে এই সৰু অভ্যাসটোৱে যথেষ্ট ইতিবাচক প্ৰভাৱ পেলাব পাৰে।
ডায়েবেটিছৰ চিকিৎসাত আজিকালি কেৱল কি খাইছে সেয়াই নহয়, কোনটো খাদ্যৰ পিছত কোনটো খাইছে, সেয়াও অতি গুৰুত্বপূৰ্ণ। এই পদ্ধতিটোক ফুড চিকুৱেন্সিং বুলি কোৱা হয়। এই নিয়ম অনুসৰি, প্ৰথমে ফাইবাৰযুক্ত শাক-পাচলি আৰু প্ৰটিন খাব লাগে, আৰু তাৰ পিছতহে ভাত, ৰুটি বা আন কাৰ্বোহাইড্ৰেটযুক্ত খাদ্য খাব লাগে। গৱেষণাত দেখা গৈছে যে আহাৰৰ আৰম্ভণিতে আঁহযুক্ত বা ফাইবাৰযুক্ত শাক-পাচলি খালে পাকস্থলীৰ পৰা খাদ্য লাহে লাহে অন্ত্রলৈ যায়। ফলত পিছত খোৱা কাৰ্বোহাইড্ৰেটবোৰো লাহে লাহে হজম হয়। ইয়াৰ ফলত আহাৰৰ পিছত তেজত চেনিৰ মাত্ৰা দ্ৰুতগতিত বৃদ্ধি পোৱাৰ আশংকা কমি যায়।
তেজৰ চেনি নিয়ন্ত্ৰণত ৰাখিবলৈ এনে শাক-পাচলি বাছনি কৰিব লাগে যিবোৰত ফাইবাৰ বেছি আৰু কাৰ্বোহাইড্ৰেট কম থাকে। উদাহৰণস্বৰূপে তিয়ঁহ, বিলাহী, গাজৰ, বন্ধাকবি, কেপচিকাম আদি খাব পাৰে। আৰু অধিক ভাল ফল পাবলৈ চালাডত গজা মগু, টেঙা দৈ, পনীৰ, সিজোৱা কণী বা গ্ৰিল কৰা মুৰ্গীৰ মাংসৰ দৰে প্ৰটিন যোগ কৰিব পাৰে। ইয়াৰ ফলত হজম প্ৰক্ৰিয়া আৰু ধীৰ হয় আৰু পেটটো বহু সময়লৈকে ভৰি থাকে। অৱশ্যে মনত ৰাখিব লাগিব যে সকলো চালাড উপকাৰী নহয়। চুইট কৰ্ণ, আলু, ভজা নুডলছ, অতিৰিক্ত মেয়নিজ বা চেনিযুক্ত চচ দিয়া চালাড খালে অপকাৰহে হ’ব পাৰে। সোৱাদ বঢ়াবলৈ নেমুৰ ৰস, ধনিয়া, পদিনা বা সামান্য অলিভ অইল ব্যৱহাৰ কৰিব পাৰে।
ভাত বা ৰুটিৰ আগতে চালাড খালেই যে ইচ্ছা অনুসৰি যিকোনো কাৰ্বোহাইড্ৰেট বা মিঠাই খাব পাৰিব, তেনে নহয়। ডায়েবেটিছ নিয়ন্ত্ৰণৰ বাবে এতিয়াও আটাইতকৈ গুৰুত্বপূৰ্ণ কথাটো হ’ল পৰিমিত খাদ্যাভ্যাস, নিয়মীয়া ব্যায়াম, ওজন নিয়ন্ত্ৰণ আৰু চিকিৎসকৰ পৰামৰ্শ অনুসৰি ঔষধ সেৱন কৰা। সুস্থ জীৱনযাপনৰ বাবে সদায় ডাঙৰ পৰিৱৰ্তনৰ প্ৰয়োজন নহয়। কেতিয়াবা খোৱা-বোৱাৰ অভ্যাসৰ সামান্য সলনিয়েও শৰীৰত ডাঙৰ প্ৰভাৱ পেলাব পাৰে। সেয়েহে, তেজত চেনিৰ মাত্ৰা নিয়ন্ত্ৰণত ৰাখিবলৈ আজিৰ পৰাই ভাত বা ৰুটি খোৱাৰ আগতে এবাটি স্বাস্থ্যসন্মত চালাড খোৱাৰ অভ্যাস কৰক।
