ৰাজ্যত বহি:ৰাজ্যৰ পৰা ব্ৰয়লাৰৰ আমদানিৰ ওপৰত নিষেধাজ্ঞা আৰোপ কৰাৰ পিছতো চলি আছে সৰবৰাহ। আজি কোৰকৰাঝাৰ আৰক্ষীয়ে এইদৰে বহি:ৰাজ্যৰ পৰা অনা ব্ৰইলাৰ ভৰ্তি ১০খন পিক আপ শ্ৰীৰামপুৰ গেটৰ পৰা জব্দ কৰিছে।
চলিত সপ্তাহৰ ভিতৰত আজি দ্বিতীয়বাৰৰ বাবে অসম-বংগ সীমান্তত জব্দ কৰা হৈছে এনে ব্ৰইলাৰ ভৰ্তি ট্ৰাক। যোৱা মঙলবাৰে একে স্থানতে ব্ৰইলাৰ ভৰ্তি চাৰিখন পিকআপ ভান জব্দ কৰিছিল আৰক্ষীয়ে।
এইদৰে জব্দ কৰা বাহনসমূহত পশ্চিম বংগৰ পৰা অসমলৈ ব্ৰইলাৰ চোৰাং ভাৱে সৰবৰাহৰ চেষ্টা চলোৱা বুলি নিশ্চিত কৰিছে আৰক্ষীয়ে। আৰক্ষীয়ে জব্দ কৰা এনে এখন বাহনত থকা এগৰাকী লোকে আৰক্ষীৰ প্ৰশ্নৰ উত্তৰত পশ্চিম বংগৰ বাৰবিছাৰ পৰা অনা বুলি জানিবলৈ দিয়ে।
তেওঁ লগতে ভানত অহা লোকসকলে কোনো অপৰাধ কৰা নাই বুলি মন্তব্য কৰি ব্ৰইলাৰসমূহ বৰবিছাত বাহনকেইখনত ভৰোৱাৰ পিছতহে অসমৰ গোসাঁইগাঁৱত দিয়াৰ বাবে লৈ আনিছিল বুলি উল্লেখ কৰে।
তেওঁ লগতে তেওঁলোকৰ জীৱিকাৰ বাবে আন কোনো চাকৰিৰ সুযোগ উপলব্ধ নহয় বাবে এই কামৰ পৰাই জীৱিকা নিৰ্বাহ কৰে বুলি আৰক্ষীৰ আগত উল্লেখ কৰে।
উল্লেখ্য যে, ঝাৰখণ্ড আৰু বিহাৰত দেখা পোৱা এভিয়ান ইনফ্লুৱেঞ্জা ৰোগৰ সংক্ৰমণ ৰোধ কৰাৰ উদ্দেশ্যে যোৱা ১০ মাৰ্চত অসম চৰকাৰে বহি:ৰাজ্যৰ পৰা ব্ৰইলাৰৰ আমদানি নিষিদ্ধ কৰিছিল।
কিন্তু নিষেধাজ্ঞাৰ পিছতো এইদৰে অবৈধভাৱে বহি:ৰাজ্যৰ পৰা ব্ৰয়লাৰৰ আমদানি অব্যাহত আছে বুলি এগৰাকী আৰক্ষী বিষয়াই স্বীকাৰ কৰিছে।
